Ndryshimi i rregullores së Kuvendit nga mazhoranca, që parashikon masa më të ashpra dënimi për deputetët, është ankimuar në Gjykatën Kushtetuese nga opozita.
Rregullorja e re u kërkua nga socialistët dhe më pas u miratua prej tyre në këshillin e mandateve dhe më tej në seancën e kaluar plenare. Gjatë fjalës në këshillin e mandateve deputeti socialist Tonin Gogu, një prej dy propozuesve të ndryshimeve në rregullore, pohoi se ashpërsimi i masave synon pikërisht deputetet e opozitës, të cilët prej javësh po bllokojnë zhvillimin normal të punimeve të Kuvendit.
Opozita kundërshtoi ndryshimet, ndërsa këtë të martë është depozituar padi në Gjykatën Kushtetuese ndaj vendimmarrjes së njëanshme të socialistëve.
Në padinë e firmosur nga 45 deputetë thuhet se dispozita e Rregullores që vendosin përjashtimin për 30 – 60 ditë të deputetit, shkel në mënyrë flagrante një sërë të drejtash që deputetit i garantohen nga Kushtetuta dhe ligji dhe nënkupton praktikisht pezullimin e deputetit nga detyra.
Opozita ngre alarmin e mundësisë së përdorimit politik të ndryshimeve në rregullore nga mazhoranca, për goditjen e opozitës.
“Organi që merr vendimet për masat disiplinore është një organ politik, i drejtuar dhe me shumicë nga mazhoranca, që nuk ofron asnjë lloj garancie sa i përket pavarësisë, paanshmërisë dhe objektivitetit në vendimmarrje. Mungesa e këtyre garancive rrezikon ta shndërrojë Rregulloren e Kuvendit në një mjet arbitrar në duart e mazhorancës për të ndëshkuar deputetët e opozitës. Në këto kushte cënohet edhe e drejta për proces të rregullt ligjor, e garantuar nga neni 42 i Kushtetutës dhe neni 6 i Konventës Evropiane të të Drejtave të Njeriut. Ndryshimet në Rregullore cënojnë parimin e shtetit të së drejtës dhe hierarkisë së normave, parashikuar nga neni 81 i Kushtetutës, pasi ato vijnë në kundërshtim me Kodin e Procedurave Administrative dhe Kodin e Procedurës Penale”, thuhet në ankim.
“Konkretisht, dispozita e Rregullores që sanksionon pezullimin e ushtrimit të funksionin të deputetit vjen në kundërshtim me nenin 242 të Kodit të Procedurës Penale, ndërsa dispozita që parashikon se ankimi nuk pezullon automatikisht vendimin e Sekretariatit për Etikën, vjen në kundërshtim me nenin 133 të Kodit të Procedurave Administrative. Rregullorja është një akt që miratohet me 71 vota, ndërsa ligjet e mësipërme miratohen me 84 vota, prandaj Rregullorja duhet të jetë detyrimisht në përputhje me këto akte, në përputhje me parimin kushtetues të hierarkisë së normave, parashikuar nga neni 81 i Kushtetutës”, shprehen deputetët e opozitës.
Sipas tyre, mazhoranca ka shkelur afatin 7-ditor të përcaktuar nga neni 83, pika 2, e Kushtetutës dhe neni 28 i Rregullores së Kuvendit sa i përket shqyrtimit dhe miratimit me procedurë të përshpejtuar të një vendimi, pasi ndryshimet në Rregullore u miratuan pa kaluar akoma ky afat.
“Rregullorja e Kuvendit është akti që garanton bashkëjetesën demokratike të palëve politike në Parlamant. Miratimi i saj, ashtu si rishikimi a ndryshimi, kërkojnë detyrimisht konsensus dhe gjithëpërfshirje. Ndryshimet e fundit u propozuan nga mazhoranca, pa asnjë konsultim apo transparencë, u shqyrtuan dhe miratuan me procedurë të përshpejtuar si shenjë e qartë arrogance dhe arbitrariteti, duke synuar ta shndërrojnë Rregulloren në një mjet ‘disiplinimi’ për deputetët e opozitës që guxojnë të protestojnë kundër akteve të mazhorancës”, thuhet në padi.
Deputetët kërkojnë nga Kushtetuesja pezullimin e këtyre ndryshimeve deri në dhënien e një vendimi përfundimtar.
