Faza e 1/8-ave të Ligës së Kampionëve do të zbulohet ditën e sotme në orën 12:00, me shortin që do të hidhet në Nion të Zvicrës.
Goglat pritet të rezervojnë përballje të nxehta, teksa kryesuesit e grupeve do të shpresojnë të shmangin skuadra si Interi, PSG-ja dhe Napoli.
Në vazon e parë bëjnë pjesë të gjitha ato skuadra që e mbyllën grupin në vendin e parë, të cilat janë: Bajern Mynih, Arsenal, Real Madrid, Real Sociedad, Atletiko Madrid, Dortmund, Man. Siti dhe Barcelona.
Në vazon e dytë janë: Kopenhagen, PSV, Napoli, Inter, Lacio, PSG, Lajpcig dhe Porto.
Skuadrat që bënin pjesë në të njëjtin grup nuk do të mund të përballen sërish në këtë fazë.
Takimet e para e këtij raundi do të luhen në datat 13/14 shkurt dhe 20/21 shkurt, ndërsa duelet e kthimit janë parashikuar në datat 2/6 mars dhe 12/13 mars.
Pasi të mbarojnë këto sfida do të hidhet shorti i çerekfinaleve, ku më pas do të mësohen dhe çiftet gjysmëfinale dhe finale.
Po sot, hidhet edhe shorti i përballjeve direkte të Europa e Conference League.
