Nga Boldnews.al
Ngjarja e rëndë në Burgun e Sigurisë së Lartë në Peqin, ku i dënuari përjetë Sokol Mjacaj vrau një të dënuar dhe plagosi me armë zjarri një tjetër, mund të ishte parandaluar jo vetëm nga ana e sigurisë, por edhe nga mbajtja e gojës mbyllur e elitës së pushtetit. Faktet sot janë ashiqare. Ministri i Drejtësisë Ulsi Manja njoftoi në orën 13.30 se i dënuari Sokol Mjacaj do të kalojë në regjimin “41 bis”.
Pikëpyetje të mëdha për sigurinë, por edhe për gojëlëshuarit që për të bërë propagandë nuk mendojnë rrezikun. Ja çfarë shkruante Manja në orën 13.30 të ditës së sotme: “Asnjë tolerancë! Do të zbatoj me rigorizitet ligjin. Mesazhi im është i prerë: Të dënuarit që cënojnë sigurinë e institucionit apo që vazhdojnë aktivitetin kriminal do të përballen me pasojat, menjëherë në regjimin e posaçëm 41/b, pavarësisht emrit apo veprës për të cilën janë dënuar!” – tha ministri, duke iu referuar pikërisht Sokol Mjacajt. Po si është e mundur që të dalë në media një vendim, para se ai të ekzekutohet?
Paradoksi është se vetëm 40 minuta pasi ministri kishte njoftuar se i dënuari përjetë kaloi në izolim, ai jo vetëm po “ajrosej” në burg, por me një pistoletë në dorë shkon në katin e parë të burgut dhe qëllon ndaj Arben Lleshit të cilën e la të vdekur në vend, ndërsa plagosi edhe Indrit Shaqjan, që të dy të dënuar përjetë.
Shumë e çuditshme që njeriu që mban edhe grada të larta si “doktor shkencash” në fushën e jurisprudencës dhe njohur gjerësisht për nivelin e lartë intelektual, t’i rrëshqasë kjo situatë. Çdo urdhër ekzekutiv që del, sidomos në fushën e rendit dhe sigurisë, nuk mund të publikohet para se të ekzekutohet. Minimalisht “qejfliu i propagandës”, duhet të kishte pritur që i dënuari të futej në regjimin 41 bis, duke renditur edhe arsyet, gjithnjë nëse nuk përbenin sekret hetimor dhe më pas me një njoftim zyrtar nga institucioni i Ministrisë së Drejtësisë do bëhej deklaratë për median.
Është shumë e qartë se në vendin tonë “lajmi më parë kalon nga burgjet”. Pikërisht kur televizionet jepnin me titra deklaratën e “doktorit të shkencave” Ulsi Manja se Mjacaj kishte kaluar menjëherë në regjimin 41 bis, i dënuari përjetë në fakt livadhiste lirshëm në të ashtuquajtur burg të sigurisë së lartë. Ndoshta i njoftuar mirë se e priste izolimi, pasi vetë Manja i drejtësisë e kishte njoftuar, ky i dënuar përjetë vendosi të kryejë një tjetër krim të rëndë. Të gjithë tani po tentojnë të bëjnë përgjegjës gardianë e drejtues të institucionit të vuajtjes së dënimit, por përveç tyre duket se edhe ministri Manja nuk duhet ta kalojë lehtë, gjithnjë nëse në këtë vend “drejtësia nuk lëviz me telekomandë” nga zyra e përhimtë në katin e dytë të godinës pranë Bulevardit Dëshmorët e Kombit.
Pikërisht ky ministër që ka vendosur prej një muaji të jetë “aktiv në media”, trumbetonte se siguria në burgje ishte në nivele shumë të larta. Ngjarja e djeshme dëshmon të kundërtën, duke tronditur më shumë se të dënuarit vetë opinionin publik. Nga njëra anë qeveria mburret me “satelitë në orbitë” apo për “inteligjencën artificiale” dhe nga ana tjetër, “inteligjenca reale” edhe e ministrave është në pikën zero, ku nga mania e propagandës janë të gatshëm të bëhen pa dashur por me papërgjegjshmëri nxitës krimesh…
