Është mbyllur pas dy orësh tension dhe dhunë protesta në afërsi të tunelit të Kalimashit në Rrugën e Kombit. Pas përleshjes së protestuesve me policinë, pasojat janë vërtetë të rënda; zyrtarisht është konfirmuar se 13 efektivë policie kanë pësuar lendime trupore, ndërsa ka të plagosur edhe nga radhët e qytetarëve.
Gjithashtu janë shkatërruar plotësisht zyrat e kompanisë konçensionare e cila prej tre ditësh vilte taksat në Rrugën e Kombit. Protestuesit pasi kanë qëlluar me gurë zyrat e kompanisë dhe “traun e taksës” i kanë vënë flakën ambienteve.
Mijëra qytetarë kryesisht nga zona e Kukësit, Kosova dhe Tirana u mblodën në një manifestim të madh kundër taksës së vendosur nga qeveria në këtë aks të rëndësishëm rrugor. Situata ka degraduar në përdorimin e dhunës, ndërsa pas negociatave mes krerëve të policisë dhe një përfaqësie të protestusve, është vendosur që të zhbllokohet rruga, ndërsa tubimi mund të vijojë edhe në vazhdim nëse nuk ka tërheqje nga ana e qeverisë.
