Ray Wilkins po lufton me jetën. Ish-mesfushori është shtruar në spitalin e Londrës, “St. George”, në gjendje kritike për jetën.
Lajmin e bëjnë të ditur mediat angleze, teksa BBC thekson se familja e ish-trajnerit, ka kërkuar respektin maksimal për privatësi, ndërsa te gazeta “Daily Mirror”, bashkëshortja e tij, ka dhënë arsyen e këtij shtrimi.
Jackie ka bërë më dije se 61-vjeçari ka pësuar një arrest kardiak dhe gjendja e tij është e rëndë. Wilkins është një emër i njohur në futbollin anglez, si lojtar edhe si trajner.
Por në karrierën e tij të gjatë, ai ka luajtur edhe në Seria A, ku ka veshur fanellën e Milanit gjatë sezoneve 1984-1987, ku është aktivizuar në 73 ndeshje dhe ka realizuar 2 gola.
Me kombëtaren e Anglisë, ai numëron 84 ndeshje dhe 3 gola të realizuar. Karrierën e tij e ka nisur te Chelsea gjatë viteve 1973–1979, dhe është autor i 30 golave në 179 ndeshje. Më pas vijoi te Manchester United (1979-1984), për të kaluar në Itali ku së bashku me Mark Hateley veshi fanellën e Milanit.
Pas mbylljes së aventurës me kuqezinjtë, Wilkins u bë një lojtar i Paris Saint-Germain, më pas kaloi te Glasgow Rangers, Queens Park Rangers, Crystal Palace dhe sërisht te QPR.
Ish-mesfushori nënshkroi më pas me Wycombe, Hibernian, MilWall e Lleyton Orient, klubi i fundit para se të “varte këpucët në gozhdë” në vitin 1997. Pas kësaj ai nisi karrierën e tij si trajner, fillimisht te Queens Park Rangers dhe Fulham, për të vijuar më pas si asistent te Chelsea, për të vazhduar me këtë rol edhe në disa klube të tjera.
Teksa në vitin 2014-2015 mori drejtimin e Kombëtares së Jordanisë, teksa eksperienca e tij e fundit ishte në stafin teknik të Aston Villa. Më vonë ai kaloi në rolin e opinionistit sportiv.
Të shumta kanë qenë mesazhet mbështetëse për Wilikins dhe familjen e tij, që nga ish-lojtarët e Chelsea si Lampard e Drogba, por edhe të ish-skuadrave të tij, duke e cilësuar si një zotëri të vërtete.
