Një penallti e çuditshme është akorduar këtë të enjte në kampionatin e Arabisë Saudite, teksa videoja po bën me shpejtësi xhiron e botës.
Episodi u regjistrua në minutën e 11’ të ndeshjes Al Hazm-Al Fateh, kur portieri mik zotëroi një top në zonën e tij. Aty pranë ndodhej mbrojtësi i Al Fateh, Al-harbi, i cili tentoi të përgëzojë portierin, por në mënyrë të pakujdesshme preku edhe topin.
Kaq mjaftoi që arbitri të vërshëllente penallti për vendasit e Al Hazm, pavarësisht protestave dhe habisë në tribuna. Gjithsesi arbitri e ka ndërgjegjen e qetë, pasi prekja me dorë lë pak vend për interpretim, ndonëse një penallti të tillë vështirë se mund të ketë parë historia e futbollit.
