Menjëherë pas trajtimit të problematikës së qendrës ku ishin strehuar gratë e dhunuara dhe nuk kishin ushqim për foshnjat e tyre nga emisioni Fiksi Fare, Shërbimi Social Shtetëror vendosi t’i largojë nga ajo qendër dhe t’i çojë te Qendra Kombëtare e Trajtimit të Viktimave të Dhunës dhe Trafikimit.
Fiksi ndoqi nga afër largimin e grave nga qendra ku vuanin për ushqimet bazë bashkë me fëmijët, për këta të fundit punonjëset në mungesë të qumështit u thonin t’i ushqeni me ujë me sheqer.
Emisioni investigative solli para 4 ditësh me zë dhe figurë bisedat e grave të dhunuara, njëkohësisht nënat e dy fëmijëve 9 dhe 20 muajsh me punonjëset e qendrës. Këto të fundit ju thonë grave që fëmijët t’i ushqejnë me ujë me sheqer.
Në bisedën e nënës me punonjësen, kjo e fundit e revoltuar i thotë disa herë gruas së dhunuar “po të pëlqeu mirë, po s’të pëlqeu këto janë kushtet”, ndërkohë nuk harron t’i thoshte që fëmijës t’i japë ujë me sheqer.
Nëna e njërit prej fëmijëve tregon se djali i saj 9 muajsh kishte 4 ditë pa ngrënë, ndërkohë punonjësja i thoshte t’i skuqte pak miell me ujë.
Justifikimi i punonjëses për mungesën e lëngjeve të frutave është se ato kanë shumë sheqer.
“Nuk sjellim lëngje frutash se kanë shumë sheqer, jepuni ujë me sheqer fëmijëve, edhe kur s’keni qumësht mos jua lini barkun bosh, ujë me sheqer jepuni” thotë punonjësja.
Gazetarëtve të Fiksit punonjësja sociale, Marinela Muçobega, tregon se kjo ka ardhur nga mosmenaxhim i mirë nga punonjëset. Ajo thotë ndihem shumë keq për situatën e krijuar, por që sot do gjejmë donatorë për qumësht dhe ushqime për fëmijët, ndërkohë punonjësja thotë që kjo gjë ka ndodhur vetëm njëherë.
“Aq i kemi mundësitë” shprehet punonjësja duke pranuar kështu mungesën e ushqimit në qendër./ TCH
