Një persona ka mbetur i vdekur dhe dy të tjerë janë plagosur, pasi një burrë sulmoi turistët me thikë dhe çekiç në qendër të Parisit, pranë Kullës Eiffel.
Mediat e huaja shkruajnë se policia vendase ka bërë të mundur arrestimin e një 26-vjeçari francez. Bëhet e ditur se në fillim ai sulmoi një çift turistësh me thikë pak metra larg Kullës Eiffel, duke plagosur për vdekje një shtetas gjerman.
Më pas ai u ndoq nga policia dhe sulmoi dy persona të tjerë me një çekiç përpara se të arrestohej. I dyshuari kishte bërtitur “Allahu Akbar” para se të kryente sulmin ndërsa i tha policisë se ishte i mërzitur me situatën në Gaza dhe se ‘shumë myslimanë po vdisnin në Afganistan dhe në Palestinë’.
I dyshuari ishte dënuar me katër vjet burg në vitin 2016 për planifikimin e një sulmi tjetër dhe ishte në listën e vëzhgimit të shërbimeve franceze të sigurisë, si dhe njihej gjithashtu për çrregullime psikiatrike.
Incidenti i së shtunës mbrëma ndodhi më pak se tetë muaj përpara se kryeqyteti francez të presë Lojërat Olimpike dhe mund të ngrejë pikëpyetje në lidhje me sigurinë në ngjarjen sportive globale.
