Pamjet që shihni në videon e mëposhtme, janë të lokalit në pronësi të 40-vjeçarit Armand Xhaferraj, të cilit iu vendos tritol në orët e para të mëngjesin të kësaj të marte në Tiranë.
Shpërthimi me lëndë plasëse ka shkaktuar dëme të mëdha në pjesën ballore të lokalit, teksa mësohet se si pasojë e shpërthimit janë dëmtuar edhe dy bizneset ngjitur, një parkueri dhe një biznes me pjesë këmbimi për automjete. Tritoli është vendosur në derën e jashtme të lokalit, ku e gjitha dera prej xhami është thyer.
Ngjarja ka ndodhur rreth orës 05:00, në rrugën “Sali Butka”. Dyshohet se lënda plasëse është vendosur për 40-vjeçarin pas një sherri për tokën përballë lokalit, tokë e cila shërben si parking në pallatin 10-katësh që u shkrumbua nga flakët pranë ish-parkut të autobusëve.
Fatmirësisht, si pasojë e shpërthimit, dëmet kanë qenë vetëm materiale.
Grupi hetimor po punon për sqarimin e rrethanave të ngjarjes, identifikimin dhe kapjen e autorit/eve.
