Pas 6-të fitoreve radhazi, Tirana ka bërë ndalesën e dytë në kampionat, teksa është mundur mbrëmjen e djeshme nga Kamza me rezultatin 78- 76 (16-21, 21-22, 20-21, 21-12), takim i zhvilluar në palestrën “Halit Coka” të Bathores.
Kryendeshja mes bardhebluve dhe kamzalinjve, rezultoi me shumë rivalitet dhe e luftuar deri në fund. Ndonëse ishte thuajse gjatë të gjithë kohës në avantazh, madje duke u shkëputur deri në +12 pikë, Tiranës i shpëtoi fitorja nga duart, me vendësit që realizuan përmbysjen e madhe në periodën e katërt.
Porter, me dy gjuajtje të lira 4 sekonda nga sirena përfundimtare, shtriu në tapet kampionët, duke fiksuar shifrat finale 78- 76 në favor të vendësve, të cilët patën edhe mbështetje të zjarrtë nga tifozët, duke i dhënë një atmosferë të ndezur palestrës së vogël.
Kjo ishte fitorja e gjashtë radhazi dhe e shtata gjithsej në kampionat për Kamzën, që tashmë e shikon veten në vend të parë në renditje. Për sa u përket paraqitjeve individuale, amerikani Keyes me 14 pikë e 16 kërcime, Tedi Lluka me 19 pikë dhe Xhersido Hajdari me 14 pikë, shkëlqyen në suksesin e Kamzës. Për Tiranën nuk mjaftoi dopieta dyshifrore e Klein Strazimirit, autor i 14 pikëve dhe 10 asistimeve, duke u shtuar edhe 5 kërcime. Davis regjistroi 29 pikë, ndërsa Myles 19.
Në ndeshjen tjetër të luajtur dje, Flamurtari mori një fitore të rëndësishme, teksa mundi në transfertë Elbasanin me rezultatin 79-83 (22-21, 26-20, 16- 23, 15-19). Bregdetaret triumfuan me përmbysje në pallatin e sportit “Tomorr Sinani”, pas një loje interesante.
