Apeli i GJKKO ka rrëzuar kërkesën e SPAK për të ndryshuar gjyqtaren Ilirjana Olldashi në shqyrtimin e dy ankimeve të Sali Berishës dhe Jamarbër Malltezit, lidhur me procesin penal për privatizimin e ish-kompleksit sportiv “Partizani”.
Berisha ankimoi në apel masën sigurimit ndaj tij detyrim paraqitje dhe ndalim i lëvizjes jashtë vendit të kërkuar nga SPAK dhe të miratuar nga GJKKO. Sipas kreut të Partisë Demokratike, vendimi i shkallës së parë është jo ligjor dhe në kundërshtim me Kushtetutën, pasi është anashkaluar institucioni i Kuvendit.
Nga ana tjetër, Jamarbër Malltezi ka kërkuar heqjen e sekuestros mbi disa prej pasurive të sekuestruara me vendim të shkallës së parë, pas kërkesës së prokurorisë.
Për të dyja rastet, SPAK kërkoi përjashtimin e gjyqtares Iliriana Olldashi me argumentin e konfliktit të interesit.
Ankimet janë shqyrtuar nga gjyqtarja tjetër e Apelit Liliana Mucca, e cila rrëzoi kërkesën e SPAK.
Me këtë vendim, gjyqi për ankimin e Berishës do të vijojë me të njëjtën gjyqtare në orën 14:00 të kësaj të premteje, ndërsa ai për ankimin e Malltezit do të rinisë në 15:00, pas ndërprerjeve të seancave të sotme me qëllim shqyrtimin e kërkesave të prokurorisë.
