Kreu i PD-së, Sali Berisha, i ftuar në emisionin “Open” ka komentuar edhe deklaratat e sotme të ambasadave të Shteteve të Bashkuara të Amerikës dhe Britanisë së Madhe, si dhe ambasadorit gjerman, në lidhje me tensionet e krijuara në Kuvend.
Lideri demokrat i konsideri si një thirrje ndaj mazhorancës për të mos bllokuar të drejtat kushtetuese të opozitës, por sipas tij, qëndrim më të qartë ka mbajtur Komisioni Evropian.
Berisha tha më tej se bashkëpunëtorët e tij kanë komunikim të rregullt dhe të hapur me ambasadën e Shteteve të Bashkuara të Amerikës në Tiranë.
“Shprehjen më të qartë si çështje e bëri Komisioni Evropian. Vuri komisionet, mos paraqitjen në interpelanca dhe mos dorëzimin e dokumenteve. Unë e interpretoj një deklaratë pozitive pa diskutim. Parlamenti mund të jetë normal vetëm kur funksionon mbi bazën e rregullave. Përveç meje, bashkëpunëtorët e mi kanë komunikim të rregullt dhe të hapur me ambasadën e Shteteve të Bashkuara të Amerikës. Unë e interpretoj si thirrje për mazhorancës për të mos bllokuar të drejtat kushtetuese të opozitës. Secila ambasadë bën formulimet e veta, por nuk mendoj kurrë që Shtetet e Bashkuara janë për një Parlament ku opozitës i mungohen të drejtat kushtetuese. Ata janë një shembull transparence”, theksoi Berisha.
