Një ngjarje e rëndë është regjistruar ditën e djeshme në rrugën “Loni Ligori”, në Unazë të Re, ku një 18-vjeçar është marrë peng për disa orë, teksa autorët i kanë grabitur me dhunë dhe varësen e floririt si dhe telefonin.
Burime bëjnë me dije se një prej autorëve është 30-vjeçari Agim Drishti, i arrestuar tashmë nga Policia e Tiranës. Mësohet se ai është djali i gazetarit Ismet Drishti, si dhe është një personazh i njohur për policinë e Tiranës, pasi rezulton i dënuar për “Prodhim dhe shitje të lëndëve narkotike” dhe “Goditje për shkak të detyrës ndaj punonjësve të policisë”.
Bashkë me Agim Drishti, në pranga në lidhje me këtë ngjarje është vënë dhe bashkëmoshatari i tij, Arnold Arapaj, ndërsa është shpallur në kërkim shtetasi R. A., 33 vjeç, banues në Tiranë.
Dy të arrestuarit dhe 33-vjeçari i shpallur në kërkim i kanë vjedhur me dhunë varësen e floririt dhe celularin 18-vjeçarit. Pasi e kanë grabitur, ata e kanë marrë adoleshentin me forcë në automjetin e tyre, duke i hequr lirinë për disa orë.
Rezulton se në dhjetor 2021 Agim Drishti, person me rekorde të mëparshme policore, është ndaluar nga një patrullë e skuadrës “Shqiponja” në Tiranë. Ndalimi i Agim Drishtit është bërë nga efektivët e grupit “Shqiponja”, të cilët kanë kërkuar fillimisht ta ndalojnë dhe më pas ta kontrollojnë.
Por Agim Drishti, ka refuzuar të ndalojë dhe ka shfaqur veprime kundërshtuese me forcë, duke goditur me grushta punonjësit e policisë së Tiranës, që shërbejnë pranë skuadrës “Shqiponja”. Nisur nga kjo situatë dhe mosbindja e vazhdueshme e Agim Drishtit, në dhjetor 2021 është bërë shoqërimi me forcë nga policia për akuzën e “Kundërshtimit me forcë të punonjësve të policisë” dhe “Goditjes për shkak të detyrës të punonjësit të policisë”.
Ky ishte një rast i përsëritur nga Agim Drishti, që shfaq sjellje dhune ndaj forcave të rendit dhe qytetarëve.
