Shqipëria arrin të kualifikohet në Kampionatin Europian të Futbollit për herë të dytë në histori.
Kjo arritje e jashtëzakonshme për futbollin shqiptar erdhi pas barazimit 1-1 në transfertë përballë Moldavisë, me kuqezinjtë e Silvinhos që janë zyrtarisht pjesë e “Euro 2024“ që do të mbahet verën e ardhshme në tokën gjermane.
Goli i vetëm për kuqezinjtë që në fund rezultoi edhe vendimtar për fatet e kualifikueseve u shënua nga Sokol Cikalleshi në minutën e 25-të të pjesës së parë.
Takimi nisi me ritëm të ulët, me skuadrat që preferuan të studiojnë njëra-tjetrën. Rasti i parë konkret erdhi në minutën e 16-të, me vendasit që me një kundërsulm rrezikuan portën e mbrojtur nga Berisha. Goditja e Nicolaescit gjeti përgjigjen e menjëhershme të “gardianit” kuqezi, i cili neutralizoi topin.
Me kalimin e minutave, ekipi i Sylvinhos u fut në shinat e duhura. Në të 24-tën, Seferi pengohet pas një vallëzimi në limitet e zonës, duke fituar kështu një penallti, të shndërruar në gol në mënyrë mjeshtërore nga Sokol Cikalleshi.
Djemtë e Serghei Clescenco u përpoqën që të reagojnë në pjesën e mbetur të fraksionit, me pasime të shpeshta rreth zonës, pretendime për 11-metërsh, por vetëm kaq.
Pjesa e dytë filloi me gabime në mbrojtje në prapavijën tonë, fillimisht Gjimshiti e më pas Seferi i kthyer mbrapa, i dhuruan mundësi moldavëve.
Jasir Asani u shfaq pas një ore lojë, gjuajtja e tij e zakonshme nga distanca u ndal nga muri mbrojtjës. Pretendimet për prekje me dorë nuk u morën parasysh nga kryesori, mjaft i vendosur për këtë episod. Pak më pas, Daku nuk shfytëzoi si duhet një krosim të ardhur nga krahët.
Në të 66-tën, Ramadani nuk ia doli dot të befasojë portierin Raielen, me një goditje nga larg. Traversa shpëtoi Moldavinë nga pësimi i golit të dytë çerek ore para fundit, me Seferin që ishte i pafat. Në minutat e fundit, ishte Baboglu që vendosi ekuilibrat përfundimisht për këtë takim.
Ky barazim na çon tashmë në Gjermani, në “EURO 2024”, për herë të dytë në histori në këtë kompeticion pas atij të vitit 2016.
Shqipëria ka bërë një rrugëtim perfekt në këto kualifikuese, duke u pozicionuar tashmë aktualisht në vendin e parë me 14 pikë.
- Emocionet në fushën e lojës pak momente pas kualifikimit
Klasifikimi:
