Ish-deputeti, Lefter Maliqi ka nxjerrë në pah infrastrukturën e shkatërruar në qytetin e Kuçovës.
Maliqi në denoncimin e tij publikon punimet skandaloze të firmës “Salillari” e cila po vendos në rrezik nxënësit dhe banorët që ecin në trotuarët e këtij qyteti.
Maliqi thekson se kjo rrugë u ka kushtuar qytetarëve plot 772 milionë lekë por cilësia e dobët e punimeve nga firma “Sallillari” ka nxjerrë në pah dëmet megjithëse ende nuk është mbushur viti nga inaugurimi.
“Skandal! Hajdari, ‘pengu’ i Salillarit s’mbush dot asnjë gropë në Kuçovë se ka rënë vet në gropë dhe se nxjerr dot as Salillari, as politika, as Drejtësia, se Zoti jo e jo. Tek shkolla Koço Korçari, Rruga e inaguruar, me një vlerë prej 772 Milionë Lekë, me gropë dhe rrëshkitje ende pa mbushur vitin, rrezik për nxënësit e shkollës dhe banorët.
Kuçova meriton ndryshim, zhvillim, siguri dhe mirëqënie! Hajdutët e votave dhe taksave të qytetarëve, herët apo vonë do të marrin ndëshkimin e merituar. Edhe nëse Drejtësia blihet, gjurmët ngelen dhe Drejtesia sado e vonuar s’do i nxjerrë dot nga gropa ku janë futur! Qesh mirë kush qesh i fundit! I duruari i fituari. Lekun e tyre se ha më as qeni! Djersa do të dalë në dritë! Kuçova meriton ndryshimin!”, shkruan Maliqi.
Edhe më herët Lefter Maliqi e ka akuzuar Salillarin për sponsorizimin dhe blerjen e votave në favor të kryebashkiakut aktual të PS, Kreshnik Hajdarin.
Hajdari tashmë është i marrë si i pandehur nga SPAK për “falsifikimin e formularëve”, pasi nuk deklaroi në formularin e “dekriminalizimit” një dënim të tij në Greqi.
