Është shoqëruar me tension mbledhja e sotme e Komisioni të Medias ku e pranishme ka qenë ministrja e Kulturës, Mirela Kumbaro.
Pavarësisht pyetjeve me këmbëngulje nga deputetët demokratë, Kumbaro refuzonte vazhdimisht të përdorte termin “shembje” për Teatrin Kombëtar.
Situata shkoi deri aty sa raportimi i ministres u kthye në një seancë sherri me zë të lartë mes saj dhe Albana Vokshit, e cila iu drejtua Kumbaros që të japë dorëheqjen.
Debati në sallë
Vokshi: Je e paditur, jep dorëheqjen.
Kumbaro: Nuk e jap dorëheqjen. Unë flas për dokumente zyrtare. Në emër të Teatrit Kombëtar janë shpenzuar 6 milionë dollarë, por projekti u ndërpre. Kryeministri shpreh vullnetin politik për një godinë të denjë teatri. Mënyra si do të ndërtohet do të jetë rezultat i procedurës ligjore. Do të ndërtojmë teatër të ri, sepse teatri për të cilin flasim është në kushte skandaloze. Turp të keni.
Vokshi: A do të shembet Teatri?
Kumbaro: Nuk diktoj mënyrën se si bëni pyetjet, ju nuk më diktoni përgjigjen!
Vokshi: Përgjigjuni pyetjes!
Kumbaro: Zonja Vokshi më jepni rastin të flas!
Vokshi: Këtu mbledhjen e drejtoj unë. Pyetjen e bëj unë: A do të shembet Teatri?
Vokshi: E kuptoj që e keni me siklet, por lërjani kryeministrit sikletin!
Mirela Kumbaro: Nuk kam asnjë lloj sikleti. Ndryshimi i VKM nuk kishte synim për të nxjerrë asnjë objekt specifik qoftë të Teatrit Kombëtar. Ajo VKM kishte shumë pasaktësira….
Vokshi: Nuk po i përgjigjeni ende 100 herë ju pyeta. E kuptoj dhe sikletin!
Kumbaro: Nuk kam asnjë lloj sikleti
Beqiri: Ti je rrezik të shkatërrosh dhe muret jo më nervat tona. Lerë zonjën ministre të përgjigjet. Boll të lutem!
Vokshi: Ule zërin!
Ismet Beqiri: Kjo është diktaturë. Mjerë thotë populli, po të vijë Albana në pushtet. Ke bërë 11 pyetje! Më hoqe trurin!
