Ditën e sotme pritet ekstradimi i Behar Bajrit, i njohur edhe me mbiemrin Brajoviq, nga Franca drejt vendit tonë, pasi ishte shpallur në kërkim nga SPAK në kuadër të operacionit “Metamorfoza”.
Bajri njihet si një prej emrave më të njohur të krimit në Shkodër, teksa në vitin 2021 ai kishte aplikuar për azil në Francë, por që iu refuzua nga drejtësia franceze. Ai pritet të mbërrijë në aeroportin e Rinasit, mbrëmjen e sotme, rreth orës 22:00
Behar Bajri ishte shpallur në kërkim ndërkombëtar, në kuadër të operacionit “Metamorfoza”, grup të pandehurish që akuzohen për vrasje, grup kriminal dhe korrupsion. Hetimet nisën në vitin 2019 pas informacioneve nga autoritetet holandeze, belge dhe franceze që zbardhën komunikimet mes anëtarëve të grupit në rrjetet Enchro Chat dhe Sky. Në këto mesazhe, biznesmeni Pëllumb Gjoka, i arrestuar, ka kërkuar që 43-vjeçari Behar Bajri të vriste për 120 mijë € Klenthi Musabelliun, ish punonjës i policisë së burgjeve. Sipas dosjes, Behar Bajri ka komunikuar me Ervis Martinajn, ish-bosin e zhdukur të lojërave të fatit, dhe kanë shkëmbyer objektivët. Behar Bajri dhe Denis Borrici ekzekutuan Gjin Boriçin me porosi të Martinajt, dhe ky i fundit do të eliminonte Kleanth Musabelliun vrasje e cila nuk u realizua pasi shënjestra kuptoi planin.
Behar Bajri kishte planifikuar që të vriste dhe Ibrahim Licin dhe Genc Tafilin.
Behar Bajri u arrestua në shtator në Francë, pasi ishte mbajtur për rreth dy javë nën vëzhgim nga pala shqiptare dhe më pas kanë njoftuar autoritetet franceze për të kryer arrestimin. 43-vjeçari mësohet se u arrestua teksa ndodhej i vetëm në një lokal në Paris. Në momentin e ndërhyrjes, të njëjtat burime bëjnë me dije se ai nuk ka bërë rezistencë ndaj oficerëve të policisë, ndërsa nuk iu gjet ndonjë send i jashtëligjshëm me vete.
