Gjykata e Apelit në Tiranë ka lënë në fuqi masën e sigurisë “arrest me burg” për 21-vjeçaren Marjana Cmeta, e cila akuzohet se ka helmuar me fostoksinë vjehrrën e saj 48-vjeçare. Po sot në vendimin e marrë, gjykata ka liruar tre personat e tjerë, mes të cilëve hoxhën që e reja i kishte treguar krimin, vjehrrin e saj dhe një kushëri të familjes.
Për të tre është vendosur masa “detyrim paraqitje” për akuzën e mokallëzimit të krimit, ndërkohë që 21-vjeçarja Cmeta do të vijojë të qëndrojë në arrest me burg pa afat për vrasje me dashje. Krimi i kryer një vit më parë nga Marjana, u zbulua falë këmbënguljes së Oltit, ish-bashkëshortit të Cmetës, i cili zbuloi videon që kishte regjistruar hoxha, tek i cili nusja shtatzënë rrëfeu me detaje se si e helmoi vjehrrën.
Në gjendje të rënduar psikologjike pas kryerjes së krimit, Cmeta ka gjetur hoxhën e zonës në Kamëz për të rrëfyer ngjarjen. Në rrethana të tilla, ai e ka regjistruar të gjithë bisedën dhe më pas për gjithçka ka njoftuar vjehrrin e së resë dhe një këshëri të familjes. Që të tre burrat kanë vendosur mos e denocojnë, por bashkëshorti i 21-vjeçares ka shkuar në prokurori dhe pretendoi se nusja i kishte helmuar nënën dhe për këtë provat ekzistonin nga një rrëfim para hoxhës së zonës.
