Komisioneri Shtetëror i Zgjedhjeve, Ilirjan Celibash ka “falur” kreun e bashkisë së Kuçovës, Kreshnik Hajdarin i cili akuzohej se ka fshehur në formularin e “dekriminalizimit” për një dënim të tij në Greqi.
Ashtu siç e kishte paralajmëruar një ditë më parë nga “Boldnews.al”, Celibashi ka legjitimuar mandatin e kryebashkiakut socialist i cili rezulton i dënuar me 4 muaj burgim nga Gjykata e Janinës në vitin 1999, për shkelje të paligjshme të kufirit.
“Ndaj vlerësoj që nuk ka një shkak ligjor që kryetarit të Bashkisë së Kuçovës t’i ndërpritet mandati”, nënvizoi Celibashi.
“Ne jemi para një fakti ku subjekti i vetëdeklaruar, tashmë kryetar i Bashkisë së Kuçovës, ka paraqitur formularin e vetëdeklarimit. Në vlerësimin e tij, ai nuk ka paraqitur një të dhënë që lidhet me një proces penal apo administrativ në një kohë të caktuar të zhvilluar në territorin e Greqisë. Në vlerësimin e tij, kjo ka qenë e panevojshme për t’u deklaruar. Ajo që ka rëndësi, është që kjo e dhënë nuk e përfshin atë në kushtet e ndalimit për shkak të veprës penale për të cilën e ka vendimin përkatës. Ngelet për t’u diskutuar pse ai nuk e ka deklaruar. Në çdo rrethanë, ka pasur detyrimin për ta deklaruar. Edhe në respektim të precedentëve të krijuar nga ky institucion që prej vitit 2020, ne kemi mbajtur qëndrim që nuk ka detyrim subjekti vetëdeklarues për të paraqitur në formularin e vetëdeklarimit rrethana dhe shkaqe që nuk e ndalojnë atë të marrin drejtimin e institucioneve publike”, tha midis të tjerash kreu i KQZ.
Drejtësia greke i ka përcjellë ministrisë sonë të Drejtësisë, një vendim që fakton se kryebashkiakut i Kuçovës, Kreshnik Hajdari është dënuar nga gjykata e Janinës, ndërkohë që në formularin e vetë-deklarimit ka thënë se nuk është i dënuar.
Ky vendim ka sjell debate mes Celibashit dhe kandidatit të koalicionit “Bashkë Fitojmë” për Kuçovën, Lefter Maliqi i cili tha se vendimi është i padrejtë duke e cilësuar si një turp të madh.
“Ne do të vazhdojmë betejën tonë deri në Strasburg. Turp e faqja e zezë. Është një turp dhe një skandal. Ky që bën ky është turpi më i madh i Shqipërisë. E kemi miratuar vetë në Parlament që kur nuk deklaron i ndërpritet mandati. Këta nuk pyesin as për Parlament, as për Gjykatë të Lartë dhe as për Gjykatë Kushtetuese”, tha midis të tjerash Maliqi.
Rikujtojmë që ditën e sotme ish-deputeti Lefter Maliqi ishte sërish në SPAK për të kryer kallëzime të reja ndaj kryebashkiakut aktual të Kuçovës, Kreshnik Hajdarit.
Pavarësisht kallëzimeve të njëpasnjëshme nga opozita dhe shkeljeve të ligjit me të “dyja këmbët”, Kreshnik Hajdarit vijon i pashqetësuar punën e tij, kurse SPAK-u “hesht” megjithëse dosjet voluminoze me kallëzime “flenë” mbi tavolinat e Prokurorisë së Posaçme.
Maliqi kallëzim të ri në SPAK për kreun e bashkisë së Kuçovës, Kreshnik Hajdarin
- Dënimi i Kreshnik Hajdarit në Greqi
Prokuroria e Përgjithshme njoftoi zyrtarisht Komisionin Qendror të Zgjedhjeve më 2 nëntor të këtij viti se Hajdari është dënuar me 4 muaj burgim nga Gjykata e Janinës në vitin 1999, për shkelje të paligjshme të kufirit.
Të dhënat e autoriteteve greke tregojnë se dënimi i dhënë për Kreshnik Hajdarin, në atë kohë 17 vjeç, ishte konvertuar në gjobë që llogaritej në shumën 1500 dhrami për çdo ditë burgu.
Procesi gjyqësor në Gjykatën e Janinës rezulton të jetë ndjekur personalisht nga Kreshnik Hajdari dhe ai është deportuar menjëherë pas përfundimit të procesit gjyqësor.
Kreshnik Hajdari ka pasur detyrimin ligjor për t’i deklaruar këto të dhëna në formularin e “Dekriminalizimit”, në momentin kur ai vendosi të kandidojë për drejtimin e Bashkisë së Kuçovës, në Mars të vitit 2023.
Por, siç rezulton nga formulari që i dorëzuar në KQZ, Hajdari nuk ka deklaruar faktin që është dënuar penalisht dhe është deportuar, ndërkohë që ka pasur dijeni, si për vendimin e gjykatës, ashtu edhe vendimin e autoriteteve policore për deportimin e tij nga Greqia në drejtim të Shqipërisë.
Fshehu dëninim në Greqi, por Celibashi pritet të mbajë në detyrë Hajdarin e Kuçovës
