Gazetari Andi Tela, ka qenë i ftuar në emisionin “Të Paekspozuarit” në MCN TV, ku ka shpjeguar rrugëtimin e futbollistit ganez, i cili humbi jetën në fushën e lojës.
Tela tha se Raphael Dwamena ishte larguar nga disa klube europiane, pas problemeve shëndetësore dhe përfundoi në Shqipëri pasi nuk luante dot në ligat kryesore.
Gazetari zbuloi se futbollisti i ishte ofruar Partizanit në Shqipëri, por ky ekip nuk hyri në negociata, për shkak të problemeve të njohura shëndetësore të ganezit, ndërkohë që në mënyrë të pashpjegueshme e gjeti rrugën te Egnatia.
“Rasti në fjalë është flagrant. Ky ishte super lojtar, që në fëmijëri dhe rini dhe erdhi të luante nga Gana për Red Bullin në Austri. Luajti edhe për kombëtaren e Ganës. Kur iu rrit vlera e kërkuan në Premier League. Në testet mjekërore, sipas standarteve në Britani, rezultoi që ky kishte probleme të theksuara të zemrës.
I thanë nuk mund të firmosësh sepse testet rezultuan negative, nuk marrim përgjegjësinë. U kthye në Zvicër, luante për liga të nivelit më të ulët. E kërkuan në Spanjë. Pagoi Levante 6 milionë euro. Luajti 2-3 ndeshje sepse edhe atje i ndodhi një episod. Nuk luajti më atje. Nga atje shkoi në Danimarkë. Luajti tre ndeshje dhe nuk e lejuan më të lunate. Pastaj shkon në Zvicër dhe luan në ligat e nivelit të pestë.
Papritur i ofrohet Shqipërisë, Partizanit fillimisht. Duke ditur historinë e tij, Partizani e refuzoi nuk hyri në negociata. Gjeti pastaj rrugën te Egnatia. Luante atje pa aparatin ndihmës të zemrës, që e kishte të detyruar ta mbante për të jetuar. Çdo lloj mjeku, me një eko të thjeshtë, e kupton që ka probleme. Nuk ka nevojë për shkencë. Por aty vendos Presidenti dhe nuk ka sistem ta bllokojë”, tha Tela.
