Komentatori Dritan Shakohoxha është “përplasur” me përfaqësuesin i ekipit të Egnatias, Xhevdet Zeka, lidhur me vdekjen në fushë të futbollistit ganez, Raphael Dwamena.
Kjo “përplasje” mes tyre ka bërë që Zeka të braktisë studion e emisionit “Review” në Euronews, ende pa përfunduar i gjithë programi.
Përplasja mes tyre erdhi pasi Shakohoxha pretendoi se futbollisti nuk ka pasur një dokument mjekësor që vërtetonte se ai ishte i aftë për lojë, çka është hedhur poshtë nga Zeka, i cili tha se ai kishte bërë kontrolle të vazhdueshme.
Pjesë nga diskutimi:
Shakohoxha: Ajo që dua të them është se përderisa e refuzuan të luajë në Spanjë, në Angli, etj, si mund ta lejonin të luante këtu? Në futbollin amator të gjithë fëmijët bëjnë analiza dhe dorëzojnë pranë FSHF-së përgjigjet. Ky djali nuk e ka pasur atë dokument që tregonte se ai ishte i aftë të luante futfoll. Dyshoj që sot një doktor të dalë sot dhe të thotë që “po” unë i kam thënë të luaj. Ai që e ka firmosur nuk do të jetë në paqe jo vetëm me veten, por edhe me ligjin.
Zeka: Në Shqipëri ka gjithollogë që edhe kur s’dinë asgjë thonë se i dinë të gjitha. Ka një dosje i nderuari shtetasi Ganez Raphael Dëamene. Po gjeti Shakohoxha një dokument që ai nuk është i aftë që të mund të luaj… Ai ka bërë analiza edhe para 2 javësh dhe mjekët i kanë thënë luaj.
Unë në këtë moment nuk kam pse rri më në studio, prandaj le të vazhdojë Shakua me argumentat e tij si i gjithëditur, për të mos thënë ndonjë fjalë më tepër unë për Shakon. Lexo zotëri lexo. Ore pyet njëher në Klub, në Federatë, sepse sapo ka vdekur një njeri dhe dokumentat janë atje. Është me dokumenta, i vizituar, i ka të gjitha. Është turp që në ditën e vdekjes së një 28 vjeçari të thuash këto gjëra.
