Që nga fillimi i luftës midis Izraelit dhe Hamasit, më shumë se 11,000 njerëz, gati 0.5% e popullsisë së përgjithshme të Rripit të Gazës , kanë vdekur dhe mesatarisht 160 fëmijë vriten çdo ditë, tha sot zëdhënësi i Organizatës Botërore të Shëndetësisë. (OBSH) Christian Lindmeier.
Në një konferencë për shtyp që dha, Lindmeier tha se deri më tani 16 punonjës të Organizatës kanë humbur jetën në kryerjen e detyrës, duke apeluar sërish për mbrojtjen e stafit të OBSH-së.
Ai raportoi 102 sulme në objektet shëndetësore në Rripin e Gazës, 121 në Bregun Perëndimor dhe 25 në Izrael. Aktualisht, tha ai, 14 spitale në Gaza janë mbyllur për shkak të mungesës së karburantit ose dëmtimit.
Duke shënuar përvjetorin e një muaji të sulmit të Hamasit ndaj Izraelit, zëdhënësi i OBSH-së përsëriti apelin e tij për lirimin e rreth 240 pengjeve, shumë prej të cilëve kanë nevojë për kujdes mjekësor. Në të njëjtën kohë, ai komentoi se asgjë nuk mund të justifikojë vuajtjet e popullatës civile në Gaza, të cilët kanë nevojë urgjente për ujë, ushqim dhe ilaçe.
Jens Lerke, një zëdhënës i Zyrës së OKB-së për Koordinimin e Çështjeve Humanitare, u tha gazetarëve se 561 kamionë me ndihma humanitare kishin hyrë në Rripin e Gazës që nga 21 tetori, por vuri në dukje se asnjëri prej tyre nuk po transportonte karburant, siç urdhëruan autoritetet izraelite.
Alessandra Velucci, drejtore e Qendrës së Informacionit të OKB-së në Gjenevë, tha nga ana e saj se më shumë se 1.5 milionë njerëz në Rripin e Gazës janë zhvendosur dhe pothuajse gjysma e tyre janë strehuar në strukturat e OKB-së.
