Bilanci i viktimave të stuhisë “Ciaran” në Evropë u ngjit në 16 të vdekur mbrëmjen e së premtes. Në Itali, rajoni i Venetos shpalli alarmin e kuq, pasi niveli i ujit u rrit më tej.
Më herët, qeveria italiane kishte shpallur gjendjen e jashtëzakonshme në 5 provinca të Toskanës, ku kanë humbur jetën 6 persona.
Situata konsiderohet e paprecedent dhe të paktën 200 persona janë evakuuar. Në disa zona, sasia mujore e reshjeve ra në vetëm 3 orë.
Në Francë, ishulli i Korsikës regjistroi erëra të forta që frynin deri në 140 km/orë, me stuhinë që ka lënë pas shkatërrim, pemë të rrëzuara dhe rrugë të përmbytura.
Në Ballkan, shtete si Kroacia, Bsonja, Mali i Zi dhe Sllovenia përjetuan gjithashtu motin e keq, që çrrënjosi pemë dhe shkatërroi çatitë e shtëpive.
Sipas meteorologëve spanjollë, një stuhi e re, e quajtur “Domingos” pritet të godasë Evropën jug-perëndimore këtë fundjavë.
