Nga Basir Çollaku:
Dosja e SPAK për Bajrajt në Shkodër, Pëllumb Gjokën e të tjerë banda nëpër Shqipëri, ka shumë detaje ngjarjesh, mes të cilave ajo me rëndësi të madhe, zgjedhjet e 14 majit. Provat e ditura po bëhen transparente, por efekti i reagimit institucional, domosdoshmërisht i Prokurorisë, mungon. Shkodër, Lezhë, Kurbin, Krujë, Durrës, Fier, Vlorë e Tiranë, vështirë të gjesh qark të pastër nga prania e së keqes.
Pyetja një miliondollarëshe është:
Të kujt ishin kandidatët e mazhorancës në zgjedhjet vendore?
Të socialistëve?
Teorikisht mbase, praktikisht jo.
Duke kapërcyer pragun ideologjik, socialistët kanë votuar me 14 maj 2023, kandidatët e logos së tyre, të cilët më herët i kanë pasur përballë e jo në krah.
Këtu jemi në rastin absurd të bukës së grurit me miell misri. Përzgjedhjet janë bërë më së shumti nga biznesi, gri dhe më tej. Për të garantuar epërsi e rezultat fitues me çdo kusht, janë përdorur masivisht grupet kriminale, në liri të plotë, në jo pak raste janë nxjerrë edhe nga qelitë, me mundësi për të ndikuar dhe ndryshuar fatet elektorale. Kjo porosi ka një përgjegjës, kreun e qeverisë, kryeministrin e vendit, natyrisht në bashkëpunim, me tërmetët e tij në Tiranë e kudo nëpër rrethe.
Në një zonë zgjedhore, ekipi i të fortëve i kërkonte llogari udhëheqjes së Partisë Socialiste lokale e përfaqësuesit qendror, përse kanë dalë vota më shumë se hesapet paraprake, kur u ndanë financat? Kë keni paguar pa dijeninë tonë? ! Surprizat kanë kosto, nuk lejohen. Kontrolli i ditës së votimit është bërë kontratë mes palëve të paligjshme, të cilët kqyrin dhe ndajnë interesa, nxjerrin përfitime, për t’i kthyer sërish në të ngjashme investime. Bashkiakët fitues tashmë janë pengje shëtitës, të detyruar të mënjanojnë përqindjen e aksionerëve të Bandave Kriminale, e cila ka negociuar lart e ekzekutuar poshtë.
Nga viti 2016, në zgjedhjet e pjesëshme vendore në Dibër, ku gjithë qeveria e të inkriminuarit, pas një skandali mbushur me turp, dhjetëfishuan suksesin elektoral, platforma u shpërnda si model fitues, duke u përsosur e forcuar rrugës në zgjedhjet e tjera të radhës, në 2017, bakshishi opozitar kanibal i 2019-tës, batërdia dyshimplotë e 2021, e me pas vendoret kriminale të 2023, janë thjesht data ku ndryshimi nuk ka gjasa të ndodhë edhe pse gjendet nëpër kuti votimi, sepse infrastruktura mafioze e shkrirë me pushtetitn, nuk ka lënë as ka ndërmend të lërë hapësirë ligjore për t’iu bindur vullnetit të qytetarëve. Kallzimet e shumta me prova të gatshme të opozitës, në të gjitha prokuroritë janë parë si ankesa për tejkalim shpejtësie të qarkullimit rrugor, ndonëse aty është burimi i mungesës së pavarësisë së drejtësisë e shembjes së demokracisë dhe eleminimi i mundësisë për të votuar, zgjedhur apo shkarkuar përfaqësuesit qeverisës.
Nga “184” e Dibrës, “339” e Durrësit, Lezhës, Vlorës, Kukësit, e Bajrajt e 2023 të Shkodrës, kujtohen arrestimet e komisionerëve të vdekur, e moskompetencat shëtitëse të dosjeve nëpër taksi, sa nga njëra në tjetrën prokurori, për të garantuar, se krimit dhe pushteti ortak të bashkëprodhuar, nuk u ndodhë asgjë. Politikanët e rrethuar nga bandat nuk dënohen dot veç e veç, ndaj shpëtojnë të dy bashkë. Ata kanë bashkitë, drejtësinë, biznesin e pushtetin së bashku. Tendera punë publike, prona publike, investime strategjike, aksione në medie, vendimmarrje në vetting e zotërues në shifra trishtuese në Policinë e Shtetit, është harta e Mafias e Mazhorancës. E, si munden kandidatët t’i vendosë njëra palë, partia e të mos jetë dakord tjetra, MAFIA, garantuesja e rezultatit?!
Kemi mbërritur në ngjashmërinë e kohës së qoftëlargut, por me shtesat të reja të së keqes. Sot, ç’do Mafia bën Partia e ç’do Partia bën Mafia ! Vetëm ikja e njërës palë merr me vete tjetrën. Në të kundërt, nuk ikën asnjëra. Qëndrojnë fatkeqësisht bashkë. Atëherë ikin shqiptarët, duke gjetur si zgjidhje, për dreq, largimin, jo reagimin.
