Është prezantuar ditën e sotme drejtori i ri i Autoritetit Kombëtar të Ushqimit (AKU), Edmond Rrushi. Ai zëvendëson në këtë post Jeta Dedën, e cila dha dorëheqjen tre ditë më parë me argumentimin se do të ndjekë një orientim tjetër profesional.
Edmond Rrushi është prezantuar para vartësve të tij, si drejtor i ri i AKU-së nga ministrja e Bujqësisë, Anila Denaj, e cila në një postim në rrjetet sociale thotë se ka përcjellë për të gjithë punonjësit e këtij institucioni mesazhin e rëndësishëm që siguria ushqimore është “gur themeli” për një jetë të shëndetshme për konsumatorët.
Rrushi ka qenë deputet nga radhët e LSI në 2019-2021. Gjithashtu ai ka mbajtur poste si drejtori i QSUT apo zv.Drejtor i Pergjithshem i ALUIZNIT gjatë qeverisjes Berisha-Meta.
Postimi i Anila Denajt:
Në prezantimin e drejtorit të ri të AKU, Edmond Rrushi, përcolla për të gjithë punonjësit e këtij institucioni mesazhin e rëndësishëm që siguria ushqimore është “gur themeli” për një jetë të shëndetshme për konsumatorët, për familjet tona.
➡️Theksova se forcimi i metodologjisë së riskut, përmes rakordimit të një plan veprimi për 2024, bashkë me Ministrinë e Brendshme, Policinë e Shtetit dhe qeverisjen vendore, është prioriteti ynë për të garantuar standardet më të larta të sigurisë ushqimore.
➡️Puna me etike dhe profezionalizëm, është një ndër cilësitë që duhet të këtë çdo inspektor i AKU.
Faleminderit Jeta Deda për drejtimin e AKU gjatë dy viteve të fundit, me përkushtimin e çmuar dhe punën e bërë sipas orientimeve ndërkombëtare.
