Ministria e shëndetësisë në Gaza, ka deklaruar se numri i njerëzve të vrarë në Gaza është rritur në 8,005. Rreth 3,324 fëmijë janë në mesin e atyre që kanë vdekur që nga 7 tetori.
Në përditësimin e saj të fundit, ministria raportoi se 7,650 njerëz kishin vdekur, që do të thotë se numri i të vdekurve është rritur me 355 nga raportimi i fundit, shkaktuar edhe nga bombardimet e fundit që Izraeli po kryen në Rripin e Gazës.
Ndërkohë Izraeli ka bërë thirrje që të evakuohen nga spitali të gjithë pacientët dhe të plagosurit, duke kërcënuar se do godasin sërish.
Lidhur me këto thirrje, shefi i OBSH-së është shprehur se “kërcënimet e evakuimit nga spitali janë thellësisht shqetësuese”.
“Ne e ritheksojmë – është e pamundur të evakuohen spitalet plot me pacientë pa rrezikuar jetën e tyre,” tha Tedros Adhanom Ghebreyesus. “Sipas ligjit ndërkombëtar humanitar, kujdesi shëndetësor duhet të mbrohet gjithmonë”, theksoi ai.
