Ylli i UFC-së Francis Ngannou, në ndeshjen e tij të parë në boksin profesionist për peshat e rënda, iu afrua një rezultati të bujshëm kundër Tyson Fury i cili fitoi me pikë në një vendim të diskutueshëm që padyshim do të krijojë shumë polemika për britanikun.
Ndeshja e zhvilluar në Rijad të Arabisë Saudite, kishte tërhequr shumë interes pasi shihej si përgatitje e sfidës mes kampionit në fuqi të WBC dhe Oleksandr Usyk, për unifikimin e të gjithë brezave botërorë të peshave të rënda.
Por Ngannou, i cili më parë kishte qenë kampion i MMA, i çuditi të gjithë në startin e sfidës.
Ai ishte aktiv në fillimet e duelit dhe në raundin e tretë, i dha një goditje të fortë Fury-t duke e shtrirë në tapet. Një raund më parë, ai kishte arritur të çante në fytyrë Fury-n dhe kjo bëri që fati i ndeshjes tashmë të mos dukej aq i sigurt.
https://twitter.com/i/status/1718401655979343932
Fury-t u duk se ishte superior vetëm në raundet e fundit, kur Ngannou ngadalësoi gjuajtjet e tij dhe mori goditje, por në asnjë moment kampioni nuk arriti t’i jepte një gjuajtje të fortë për ta shtrirë në tapet, ashtu siç kishte bërë kundërshtari i tij.
Në fund, vendimi i gjyqtarëve i dha fitoren me pikë Fury-t duke bërë që të shpërthenin protestat në rrjetet sociale kryesisht, pasi të gjithë mendonin se kamerunasi kishte bërë mëse mjaftueshëm për të qenë ai fituesi edhe pse kjo ishte ndeshja e tij e parë në ringun profesionist.
