Era e fitilit të dinamitik teksa digjej, shpetoi jetën e 35-vjeçarit që ishte edhe pronari i lokalit ku ndodhi shpërthimi. Sipas policisë, nga rrëfimet që ka treguar Selim Lika, pasi ka ndjerë erën e fitilit është larguar dhe fatmirësisht nuk ka pësuar dëme të shumta trupore.
Eksplozivi është hedhur nga dritarja e tualetit të lokalit që Lika kishte marrë me qira. Ngjarja ndodhi në lagjen “Partizani”, mbrëmjen e djeshme ku një sasi eksplozivi shpërtheu në një lokal përballë shkollës 9-vjeçare “31 Korriku”.
Shpërthimi ka qenë tepër i fuqishëm saqë ka shkatërruar gjithçka në ambientet e brendshme të barit. Policia dhe grupi hetimor ishin në vendin e ngjarjes, ndërkohë që deri tani janë marrë në pyetje disa persona, kryesisht ata që kanë në pronësi lokalin dhe ata që e kishin me qera.
