- “Boldnews”, në vijim të dosjes “Karaburuni”, do të publikojë listën e plotë të personave Vip, që
kanë blerë prona në këtë zonë, si edhe skemën se si është arritur të shndërrohet një tokë publike në private dhe më tej është tjetërsuar.
Plot 81 vjet burgim kërkon Prokuroria e Vlorës për6 të akuzuarit e fallsifikimit të mbi 220 hektarë tokë në Karaburun.
Për Raimond Mëzin dhe Lefter Gjergjin, dy persona që kanë kryer veprimet e paligjshme në Hipoketë, prokurorët kërkojnë përkatësisht nga 21 dhe 19 vjet burgim.
Dënimin më të lartë, Prokuroria e Vlorës e kërkon për avokatin Enkes Hysendhima, me firmën e të cilës janë legjitimuar fallsifkimet e pronave. Për të, prokurorët kërkojnë 24 vjet burgim.
Gjithashtu, listën e të akuzuarve e plotësojnë edhe juristen e Hipotekës, Blerina Dhrami, për të cilën kërkohet 11 vjet burgim, si edhe për sekretaren e gjykatës, Donika Besimaj, për të cilën kërkohet 6 vjet burgim.
Hetimet për dosjen “Karaburuni” kanë nisur në qershor 2016. Fillimisht, Prokuroria e Vlorës vendosi sekuestro mbi tokën e dyshuar si të fallsifikuar. Më tej, hetimet u shtrinë tek personat e dyshuar për këtë vepër penale, të cilët u arrestuan.
Pas më shumë se një viti gjykim, procesi ka arritur në fazën e konkluzioneve përfundimtare. Pas kërkesës së prokurorisë, tashmë pritet fjala e mbrojtjes.
Dosja “Karaburuni” është dëshmi e qartë e masakrës me tokat që është bërë prej vitesh në bregdetin shqiptar.
