Një histori tronditëse por plot dashuri ka qenë ajo e djeshmja në emisionin “Dua të të bëj të lumtur”.
E kush tha që njerka nuk mund të të bëhet mama? Historia e Mariglenit është e dhimbshme. Jeta e tij ka qenë kalvar vuajtjesh.
Ai që nuk shijoi kurrë fëmijërinë si bashkëmoshatarët e tij ka parë tmerr me sy në jetë; nënën e tij e ka vrarë njerku 6 muajshe shtatzënë dhe për më tepër e ka mbajtur në shtëpi për dy ditë së bashku me dy fëmijët e mitur. Por Marigleni krimin horror e ka mësuar nga televizori.
I gjendur i vetëm dhe pa përkrahje i riu u mësua me jetën e rrugës, duke kërkuar lëmoshë. Megjithatë në këtë rrugëtim të trishtë Marigleni ishte ndeshur me njerëz, të cilët ishin munduar që ta ndihmonin. Një ndër ta ishte dhe njerka e tij, Fetija.
Ajo ishte personi i vetëm që e kishte parë me sytë e një nënë dhe që i kishte falur dashuri pa kushte. Madje vendimin për ta gjetur e kishte bërë pa dijeni e bashkëshortit të saj, babait biologjik të djalit.
Por Marigleni nuk ishte sjellë ashtu si duhej. Ndaj kishte zgjedhur programin “Dua të të bëj të lumtur” për t’i kërkuar falje Fetijes, por edhe që të ribashkohej me familjen e tij.
Kur Arbana e pyeti Fetijen se kush ishte personi që po shikonte në ekran, ajo u përgjigj: “Është djali im”. Kjo fjali e emocionoi Mariglenin, i cili mbuloi fytyrën me duar dhe filloi të qante.
Mes lotëve Marigleni tha: “Më ka ngelur diçka në mendje që nuk ta kam thënë në gjithë këto vite, unë merrja bukën që ti më jepje dhe thjesht largohesha. Sot dua të të them faleminderit. Të faleminderit që ishe një nënë për mua. Më fal që nuk kam qenë djali që ti meritoje, më fal për të gjitha problemet që të kam shkaktuar.”
Marigleni i kërkoi Fetijes që ai të jetonte me të dhe ajo iu përgjigj duke i thënë që derën e shtëpisë e ka të hapur gjithmonë. Biseda që u zhvillua midis tyre përloti jo vetëm ata, por edhe publikun që ndodhej në studio.
Pas shumë vitesh nënë e bir përqafuan njëri-tjetrin duke hedhur hapin e parë drejt ribashkimit të tyre.
