Presidenti iranian Ibrahim Raisi akuzoi sot Shtetet e Bashkuara të Amerikës si “bashkëpunëtore në krimet” e Izraelit, një ditë pas bombardimit të një spitali në Gaza, në të njëjtën ditë kur Presidenti amerikan Joe Biden ndodhet në Izrael.
“Bombat që bien mbi popullsinë e Gazës janë amerikane. Bota e konsideron SHBA-në si bashkëpunëtore në krimet e regjimit izraelit”, u tha Raisi disa mijëra protestuesve që u mblodhën në një shesh të Teheranit.
Ndërkohë, zëdhënësi i Ministrisë së Shëndetësisë në Gaza, Ashraf Al-Kindra, tha në një deklaratë të mërkurën në mëngjes se 471 palestinezë u vranë dhe më shumë se 314 të tjerë u plagosën në atë që ai e përshkroi si “masakrën izraelite” në spitalin Al-Ahli Al.
Zyrtarët palestinezë pretendojnë se shpërthimi, i cili ndodhi të martën në mbrëmje në spital, ishte rezultat i një sulmi ajror izraelit. Nga ana e tij, Izraeli njoftoi se shpërthimi ishte shkaktuar nga një lëshim i dështuar i raketës nga grupi palestinez Xhihadi Islamik, i cili mohon përgjegjësinë.
Në të njëjtën kohë, grupi islamik palestinez Hamas akuzoi Uashingtonin se ishte “bashkëpunëtor në masakrat” që pretendon se ishin kryer nga Izraeli në Gaza, pasi Presidenti i SHBA Joe Biden pranoi versionin izraelit të një rakete që vrau qindra njerëz në një spitali.
