Kryetari i Partisë Demokratike Lulzim Basha kë vizituar sot zonat e përbytura në Shkodër dhe pasi ka takuar banorët e prekur dhe pa gjendjen reale, kërkoi që qeveria të shpallë menjëherë emergjencën. “Të shpallet menjëherë gjendja e emergjencës në Bashkinë e Shkodrës dhe të Vaut të Dejës! Përgjegjësi për përmbytjen e Shkodrës, është KESH me shkarkimet nga kaskada e Drinit”-deklaroi Basha.
Si pasojë e hapjes së portave të hidrocentraleve në kaskadën e Lumit Drin, mbi 5500 hektarë tokë bujqësore është përbytur, ndërsa banorët bëjnë thirrje për ndihmë prej dhjetë ditësh. Deri më tani janë evakuuar një pjesë e familjeve në rrezik, ndërsa të pranishme përveç përfaqësuesve të pushtetit lokal janë edhe forcat e ushtrisë.
Banorët ankohen se përbytjet nuk u erdhën si pasojë e reshjeve të shiut, por nga keqmenaxhimi i KESH, që ka hapur portat e hidrocentraleve, ndërkohë do të duhej që të menaxhohej kohë më parë kjo situatë me shkarkime të kontrolluara. “Edi Rama ti japë fund heshtjes fajtore. Mosshpallja e emergjencës është e papërgjegjshme dhe kriminale”-deklaroi Basha.
