Një qen i një familjeje, i cili u varros nga pronarët e tij teksa menduan se ai kishte ngordhurr, arriti të gërmonte dheun dhe të kthehej në shtëpi.
Kjo është ngjarja e pabesueshme e cila ka ndodhur në fshatin rus, Novonikolsk.
Qeni i quajtur Dik, 18 vjeç, u zbulua i palëvizur në batanijen e tij, teksa pronarët e zemërthyer, dy motrat e moshuara, për shkak të moshës supozuan se kishte ngordhur.
Menjëherë ata u mblodhën së bashku për t’i dhënë atij një funeral disa kilometra larg fshatit, raporton “The Mirror”.
Por ai çuditërisht u zgjua pak pasi u varros dhe arriti të dilte duke gërmuar nga varri i tij i cekët. Ai përfundoi në anë të një autostrade aty pranë ku kalimtarët dalluan qenin e rraskapitur.
Ata e morën atë dhe e çuan në strehën e kafshëve shtëpiake në Otkroi Svoe Serdtse (Hape zemrën).
Pronarët e Dikut i panë fotografitë dhe erdhën në strehën e kafshëve për ta çuar në shtëpi. Irina Mudrova, e cila është drejtuese e strehës, tha: “Fatmirësisht e varrosën jo thellë nën tokë dhe ai arriti të dilte në sipërfaqe pasi kishte rifituar vetëdijen. Pronarët e tij, dy motra të moshuara, erdhën për ta çuar në shtëpi dhe qanë.”
