Vrasja e 38-vjeçarit, Fatjon Dervishi, ditën e djeshme në Sukth të Durrësit, vijon të jetë ende në sitën e hetimeve ndërsa detaje të reja dalin në dritë.
Viktimës dyshohet se i është zënë në pritë tek shinat e trenit në Sukth dhe është qëlluar me breshëri plumbash, teksa ishte nën drejtimin e një automjeti. Autorët vijojnë ende të jenë të paidentifikuar, ndërkohë sipas hetuesve kemi të bëjmë me vrasës me pagesë, dhe qitës profesionist, pasi kanë qëlluar vetëm objektivin dhe personi që e shoqëronte 38-vjeçarin, nuk ka marrë asnjë lëndim.
Teksa organet ligjore mbeten në pritje të informacionit të Interpol Tiranës për të identifikuar lidhje shoqërore të viktimës apo shtetas me të cilët mund të ketë pasur konflikte, jashtë vendit, kanë ngushtuar rrethin e hetimit. Pista e parë ku po hetohet është Prishja e pazareve të drogës, pasi viktima ishte përfshirë në grupe kriminale që veprojnë në trafikimin e kokainës në Holandë, dhe pista e dytë është vrasje për hakmarrje për shkak të vellait të tij, i cili akuzohet për zhdukjen e një personi në Spanje si dhe disa krime të tjera që ka marrë pjesë.
Ndërkohë të 7 personat e shoqëruar që u morën në pyetje ditën e djeshme lidhur me rastin, janë lënë sërish të lirë, pasi nuk kanë gjetur elementë për t’i implikuar në ngjarje.
Ditën e sotme grupi i hetimit ka sekuestruar kamerat e sigurisë në zonën ku ndodhi krimi dhe po kontrollojnë pamjet filmike. Prokuroria e Durrësit do të kërkojë bashkëpunimin e homologëve holandezë dhe atyre spanjollë për të hedhur më tepër dritë mbi këtë atentat ku mbeti i vdekur 37 vjeçari, baba i dy fëmijëve.
