Një ekzekutim me armë zjarri ka ndodhur paraditen e kësaj të marte në qytetin e Rrëshenit, ku i vrarë ka mbetur Martin Bardhi, 62 vjeç dhe janë plagosur tre të tjerë.
Krimi, që mendohet të jetë i mirëplanifikuar, dyshohet të ketë si motiv hakmarrjen ndaj 62-vjeçarit të vrarë.
Dinamika
Sipas një rindërtimi paraprak të ngjarjes, Bardhi është qëlluar me breshëri kallashnikovi nga një automjet në lëvizje teksa ishte duke pirë kafe bashkë me tre persona të tjerë në lokalin e tij. Bari ndodhet buzë rrugës, në qendër të qytetit, me një distancë prej rreth 50 metra larg komisariatit të Rrëshenit.
Si pasojë e të shtënave, Bardhi humbi jetën, ndërsa tre personat ulur në një tavolinë me të u plagosën. Ata janë Ilir Bardhoku, ish-drejtor në bashkinë e Mirditës, Olti Gjini pronar i një picerie në zonë, si dhe Indrit Bardhi, i afërm i viktimës. Të plagosurit janë transportuar drejt spitalit të Traumës në Tiranë.
Mjeti tip fuoristradë i përdorur nga autorët në krim u gjet i djegur më pas në fshatin Gëziq të Mirditës.
Kreu i policisë së Lezhës, Alfred Elezi, në një prononcim për gazetarët nga vendngjarja, tha se autorët e krimit ishin dy, ndërsa ende nuk janë identifikuar nga policia.
“Rreth orës 10:40, në qytetin e Rrëshenit, në lokalin e tij është vrarë me armë zjarri shtetasi Martin Bardhi. Janë plagosur dhe tre persona të tjerë që kanë qenë në tavolinë me të. Autorët e ngjarjes janë dy persona të maskuar me një fuoristradë e cila pak pas ngjarjes është djegur në fshatin Gëziq”, tha Elezi, drejtor i Drejtorisë Vendore të Policisë së Lezhës.
Pamje nga vendngjarja
“Forca të shumta policie kanë rrethuar zonën dhe në ndihmë të Policisë lokale, janë nisur Forcat Speciale “RENEA” dhe FNSH, si dhe në Rrugën e Kombit, në drejtim të Kukësit, të Laçit, Lezhës dhe Dibrës, janë ngritur pika kontrolli. Gjithashtu, drejt vendit të ngjarjes janë nisur Zv/drejtori i Përgjithshëm i Policisë së Shtetit dhe drejtorët e departamenteve të Policisë Kriminale, si dhe të Rendit dhe Sigurisë Publike. Për zbardhjen e kësaj ngjarjeje është ngritur një grup i posaçëm hetimor, me specialistë nga Departamenti i Policisë Kriminale në DPPSH dhe nga Policia vendore, dhe në drejtimin e prokurorit, vijon puna intensive për identifikimin dhe kapjen e autorëve”, thuhet në një njoftim zyrtar të policisë lokale.
Dyshimet
Dyshimet e para të grupit hetimor, nisur edhe nga e kaluara e viktimës, janë se krimi mund të ketë ndodhur si një hakmarrje e mundshme.
Martin Bardhi kishte pak kohë që kishte lënë qelinë e burgut (pas zbutjes së masës në ‘detyrim paraqitje’ nga gjykata e Lezhës me kërkesë të prokurorisë) pas arrestimit lidhur me plagosjen ndaj Saimir Rreçit po në Rrëshen, disa muaj më parë.
Kjo ngjarje ndodhi më 26 Mars dhe të përfshirë sipas hetuesve, ishin edhe djali i Martin Mardhit, Erind Bardhi dhe një 28-vjeçar tjetër me lidhje gjaku me familjen Bardhi.
Shkak për këtë ngjarje të rëndë dyshohet se u bë një sherr për vendin e parkimit mes Erind Bardhit dhe Saimir Reçit. Erind Bardhi shkoi më pas në banesën e tij së bashku me të atin, viktimën e ditës së sotme, ku mori armën e zjarrit dhe qëlloi mbi makinën e blinduar të Reçit në momentin që ai po largohej. Reçi si pasojë e të shtënave humbi kontrollin e mjetit dhe u përplas me bordurën e rrugës, por nuk u lëndua.
Për këtë ngjarje, Erind Bardhi dhe kushëriri i tij 28-vjeçar u shpallën në kërkim për vrasje me paramendim të mbetur në tentativë dhe armëmbajtje pa lej, ndërsa Martin Bardhi u arrestua.
Ndërsa Saimir Reçi është nipi i Kastriot Reçit, i ekzekutuar në qendër të Rrëshenit në vitin 2020.
