Ndeshja klasike e futbollit holandez mes Ajax dhe Feyenoord e kësaj të diele, u ndërpre në minutën e 56 të sfidës.
Shkak u bë protesta e dhunshme e tifozëve vendas të cilët hodhën fishekzjarrë e tymuese në fushë në shenjë revolte ndaj skuadrës së tyre që po mundej 0-3.
Dominimi i rivalëve historikë solli tërbimin e tifozëve, të cilët prej kohësh protestonin kundër drejtuesve të Ajaksit për rezultatet e dobëta të skuadrës që është shumë larg kreut që në javët e para. Tifozët më pas vandalizuan ambientet e jashtme të stadiumit “Johan Krujf” duke bërë që të ndërhynte policia për t’i larguar, teksa ndeshja ishte braktisur.
Sot “Eredivisie” ka vendosur që kjo sfidë të vazhdojë dhe të mbyllet rregullisht. Dueli do të luhet në të njëjtin impiant, duke filluar nga minuta e ndërprerjes së sfidës me rezultatin 0-3 për Fejenordin. Por në ndryshim nga ndeshja e të dielës, tribunat do të jenë të boshatisura, pasi ajo do të luhet me dyer të mbyllura.
Përtej kësaj, pritet që shumë shpejë të merren masa të tjera disiplinore ndaj Ajaksit, që rrezikon të luajë pa praninë e tifozëve disa ndeshje në të ardhmen, duke komplikuar edhe më shumë pozitat e skuadrës legjendare.
