Komisioneri Publik ka ankimuar vendimin e Komisionit të Pavarur të Kualifikimit për konfirmimin në detyrë të Prokurorit të Elbasanit, Artur Ismajluka, pas rekomandimit të ONM-së.
Procesi i vetingut për prokurorin Artur Ismajlukaj u krye nga trupa e KPK e kryesuar nga Etleda Çiftja, me relatore Suela Zhegun dhe anëtare Alma Faskajn. Në cilësinë e vëzhguesit ndërkombëtar ishte i pranishëm Gerrit Sprenger.
Në vendimin e saj, KPK veç konfirimimit në detyrë kërkonte nga Inspektorati i Lartë i Drejtësisë një vlerësim, nëse kishte shkelje disiplinore, për shkak të disa udhëtimeve të tij me persona me precedentë penalë. Në argumentat e tij, gjatë shqyrtimit në seancë publike të KPK, Ismajlukaj tha se udhëtimet ishin të rastësishme.
Në kërkesën e depozituar pranë Kolegjit të Posaçëm të Apelimit, vihet re se pikat mbi të cilën realizohet ankesa janë pikërisht udhëtimet e prokurorit me persona me precedentë penalë.
“Komisioneri Publik, bazuar në aktet e administruara në dosje të Komisionit, referuar rrethanave të rezultuara nga kontrolli i figurës, në konsideratë dhe të përmbajtjes së Gjetjes të paraqitur nga Vëzhguesi Ndërkombëtar i çështjes, si dhe Rekomandimit të ONM-së, vendos në vëmendje të Kolegjit se: Nga baza e të dhënave TIMS rezulton e provuar se subjekti i rivlerësimit, ka kaluar kufirin shqiptar me një mjet në pronësi të një shtetasi, i cili rezulton një emër i njohur nga drejtësia shqiptare, i shpallur fajtor më në vitit 2016 nga Gjykata e Rimini Ufficio G.I.P- (në Itali), për 5 akuza për shitje të paligjshme të lëndëve narkotike dhe një akuzë për armëmbajtje pa leje, duke u dënuar me 4 vjet e dy muaj burgim dhe gjobë prej 26.000 euro”, lexohet në një nga argumentat e paraqitura nga Komisoneri Publik. Pjesë e dosjes ishin dhe disa udhëtime të tjera.
Në fund të argumenteve të paraqitura, Komisioneri Publik në ankesën e saj thekson se “vendimi i Komisionit nuk është në pajtueshmëri të plotë me gjendjen e fakteve dhe provave të administruar në fashikull, për krijimin e bindjes se subjekti i rivlerësimit arrin nivel të besueshëm për konfirmimin e tij në detyrë. Duke ritheksuar se Komisioneri Publik ka detyrimin që të ushtrojë kontroll mbi vendimet e dhëna nga Komisioni, me qëllim që të garantojë mbrojtjen e interesit publik në procesin e rivlerësimit, duke vlerësuar në qoftë se vendimmarrja e Komisionit për konfirmimin ose shkarkimin e subjektit, ose ndërprerjen e procesit të rivlerësimit është marrë në përputhje me ligjin, në përfundim të një hetimi të plotë, mbështetur në faktet dhe provat e administruara për këtë qëllim”, përfundon kërkesa e Komsionerit Publik
Artur Ismajlukaj e nisi karrierën si oficer i policisë gjyqësore në Prokurorinë e Tropojës në vitin 2005. Ai u emërua prokuror në vitin 2014 dhe e ushtroi funksionin fillimisht pranë Prokurorisë së Tropojës dhe më pas në Prokurorinë e Elbasanit.
