Nga Boldnews.al
Disa institucione shtetërore janë kthyer në “çifligje” të drejtuesve, të cilët bëjnë shpenzime luksi për punonjësit. I tillë ishte edhe tenderi i vjetshëm i Skerdi Drenovës i OST-së, i cili merrte përsipër edhe ndërhyrje estetike për punonjësit.
Por, këtë vit, një tender të ngjashëm e ka bërë Enti Rregullator i Energjisë. Por s’do të rregullojë energjinë, por do të “rregullojë” punonjësit e saj. Sipas organigramës, ERE ka 63 punonjës, ku rolet kryesore i kanë punonjësit me arsim juristë, ekonomistë apo edhe inxhinierë, pa futur këtu sektorët e tjerë.
Ndërkohë, ndryshe nga qindra mijëra punonjës të tjerë shtetërorë, të cilët shërbimet mjekësore i marrin në spitalet shtetërore, punonjësit e ERE-s do t’i marrin këto shërbime në privat.
Një paradoks i madh, pasi shteti paguan njëherë për sigurime shëndetësore për këta punonjës, ndërkohë që vetë shteti (ERE) bën tender që t’i sigurojë privatisht këta punonjësit. Madje, duke shpenzuar qindra mijëra euro.
Sipas dokumenteve që disponon redaksia e BoldNews.al, kryetari i bordit të ERE-s, Petrit Ahmeti ka urdhëruar kryerjen e procedurës së prokurimit “sigurimi shëndetësor privat i punonjësve të ERE”.
Fondi limit i këtij tenderi është plot 22.000.000 lekë, ndë3rsa bëhet fjalë për “shërbimeve të sigurimit e jetës” dhe “shërbim i sigurimeve shëndetësore”. Objekti e thotë mjaft qartë; sigurimi privat shëndetësor!
Por, a nuk paguan shteti për këta punonjës sigurime shëndetësore? Përse taksapaguesit duhet të paguajnë dy herë për këta punonjës?
Çfarë tagri kanë? A nuk u mjaftojnë spitalet shtetërore? Check-up dhe analizat në spitale apo poliklinikat?
Duket një shpenzim i kotë, pasi për vetëm 63 punonjës do të paguhen 220 milionë lekë të vjetra. Nga një llogaritje e thjeshtë rezulton se ERE për 1 punonjës do të shpenzojë plot 3.5 milionë lekë të vjetra. Por sigurimi është vetëm 1 vjeçar, çka do të thotë se kostoja është tepër e fryrë.
