Në seancën e sotme parlamentare u miratuan dekretet e kreut të shtetit për shkarkimin e Delina Ibrahimajt si ministre e Financave dhe zëvendësimi i tij me Ervin Meten.
Këto ndryshime ishte të vetmet që nuk u votuan në seancën e së hënës, pasi për të marrë detyrën e ministrit, Mete duhej më parë që të linte atë të kreut të AMF-së.
Kështu në seancën e kaluar u votua shkarkimi i Metës nga ky post, ndërsa këtë të enjte deputetët socialistë i dhanë 74 vota pro për të qenë në krye të ministrisë së Financave. Shkarkimi i Ibrahimajt mori 105 vota pro. Ajo është emëruar në krye të Ministrisë së Sipërmarrjes me 73 vota pro.
Deputet demokrat Gazment Bardhi tha se dekreti i Begajt që i dha konsensus urdhrit të kryeministrit Edi Rama për të zgjedhur ministër Meten është në kundërshtim me Kushtetutën.
“Ministri nuk mund të ushtrojë asnjë veprimtari tjetër shtetërore dhe as të jetë drejtues ose anëtar i organeve të shoqërive fitimprurëse”, thuhet në nenin 102 të Kushtetutës, të cilit iu referua Gazment Bardhi.
Deputeti shpjegoi se dekreti i Begajt për emërimin e Metes ministër ka ardhur në një kohë kur ai mbante ende detyrën e kreut të Autoritetit të Mbikëqyrjes Financiare.
Presidenti, tha Bardhi, ka bërë një dekretim pa kryer asnjë verifikim.
Ndërsa deputetja tjetër demokrate Ina Zhupa paralajmëroi padi në Kushtetuese për çështjen. “Presidenti ta kuptojë kur duhet të heshtë dhe kur duhet të flasë. Presidenti i Republikës bëri ministër kreun e AMF. Mandati i tij do të shkojë në Gjykatë Kushtetuese”, tha ajo.
