Në foton e mësipërme është momenti kur 51-vjeçari Petrit Ndoji nga Lezha zhvillon një bisedë më një person në qytetin e Vlorës, për shitjen e 4 minave me telekomandë, për shpërthim në distancë. Tv Klan ka siguruar këtë foto nga grupi hetimor, ku shfaqet 51-vjeçari dy ditë përpara arrestimit nga policia.
Biseda është zhvilluar në ambientet e një bar kafeje në qytetin e Vlorës, ku mes Petrit Ndojit dhe personit tjetër është dakordësuar shitja e 4 minave për 10 mijë euro.
Burime pranë grupit hetimor bënë me dije se ka dyshime që 51-vjeçari, me precedent të mëparshëm kriminal merrte minat me telekomandë në zonën e Milotit dhe nga aty i shiste në Vlorë për llogari të grupeve kriminale.
Ndërhyrja e policisë ka ardhur sapo Petrit Ndoji është futur në qytetin bregdetar aty ku do dorëzonte minat të cilat siç shihet ishin fshehur në kroskotin e makinës që ai drejtonte. Policia nuk jep detaje për personat që do të blinin minat.
Ky është rasti i dytë i goditur nga policia në harkun kohor të 1 muaji, pasi edhe në gusht po në Vlorë uniformat blu sekuestruan 2 mina me telekomandë dhe vunë në pranga 2 persona, xhaxha dhe nip të cilët lëndët plasëse do i shisnin tek grupet kriminale me qëllim përdorimin në ngjarje të rënda.
