Mesfushori i Juventusit, Paul Pogba, ka dalë pozitiv në një test dopingu.
Ai rezultoi pozitiv në një test të kryer më 20 gusht pas ndeshjes ndaj Udinezes ku bardhezinjtë triumfuan 3-0 në transfertë.
Lajmi është bërë i ditur nga mediat italiane, ku analizat e kryera zbuluan gjurmë të larta të testosteronit në gjak.
Sipas mediave italiane, testosteroni është një substancë që nuk mund të merret me një përjashtim terapeutik. Prandaj, Pogba rrezikon një dënim maksimal prej katër vitesh skualifikim.
Ndërkohë do të duhet një test i dytë për të konfirmuar pozitivitetin dhe për të kuptuar se cila mund të jetë linja mbrojtëse e francezit, kampion bote në vitin 2018.
Rasti i fundit i një polemike dopingu në Serinë A është ai i argjentinasit tek Atalanta, Hose Luis Palomino, i cili doli pozitiv për nandrolone në vitin 2022, por më pas u lirua nga Gjykata Kombëtare Anti-Doping.
