Një ngjarje e rëndë raportohet të ketë ndodhur mbrëmjen e djeshme në Gjakovë, ku është shkëputur ashensori i një ndërtese e si pasojë janë plagosur dy persona.
Lajmin e ka konfirmuar zëdhënësi i Policisë së Kosovës për rajonin e Gjakovës, Sheremet Elezaj.
Elezaj tregoi se në ashensor kanë qenë një çift me dy fëmijë. Zëdhënësi njoftoi se ashensori ka rënë në bodrumin e banesës. Prindërit janë dërguar në Spitalin e Gjakovës për ndihmë mjekësore, ndërsacfëmijët kanë shpëtuar pa lëndime.
“Rreth orës 21:15 është këputur kavo e një ashensori në një objekt banesor në Gjakovë. Ashensori ka rënë në bodrum. Dy persona kanë pësuar fraktura. Në ashensor kanë qenë katër persona, prindërit dhe dy fëmijë të vegjël (foshnja)”, ka thënë Elezaj.
Mjeku i Spitalit “Isa Grezda”, Arben Veseli u shpreh se pacientja ka pësuar thyerje në gju dhe i është nënshtruar një operacioni. Ndërsa, për pacientin tjetër mjeku tha se pritet që sot t’i nënshtrohet operacionit, pasi ka thyerje të dy nyjet e poshtme të këmbëve.
