Këshilli i Lartë i Prokurorisë duket se ka marrë një mision të ri kundër zjarreve në vendin tonë. KLP ka marrë si nismë për të ashpërsuar dënimet kundër zjarrëvënësve.
Kjo gjë është diskutuar gjatë një takimit të kreut të KLP-së, Alfred Balla me ministrin e Brendshëm Taulant Balla. Një pikë tjetër në takimin mes dy Ballave ka qenë dhe dhe eficenca e Oficerëve të Policisë Gjyqësore pranë Drejtorive të Policisë ku KLP-ja vëren mungesë stabiliteti, që shkaktohet nga lëvizjet e shumta mes radhëve të këtyre oficerëve.
Po ashtu është diskutuar dhe mbi veprimtarinë e Komisionit të Mbrojtjes së Prokurorëve ku ka përfaqësues të Ministrisë së Brendshme dhe Drejtorisë së Përgjithshme të Policisë.
Gjithashtu, bëhet me dije se Balla i KLP-së ka mbështetur Ballën e ministrisë në intensifikimin e goditjes së fenomenit të shpërndarjes së lëndëve narkotike dhe vlerëson pozitivisht propozimin për ashpërsimin e dënimeve ndaj veprave kriminale të kryera brenda perimetrit të sigurisë së shkollave.
