Kombëtarja e futbollit e Shqipërisë do të luajë ditën e nesërme një ndeshje vendimtare kundër Çekisë, për të përcaktuar fatin e kulifikimit në EURO 2024.
Po njësoj e rëndësishme është dhe përballje e 10 shtatorit me Poloninë. Skuadra e Silvinjos do të përballet praktikisht me dy kandidatet favorite për të prerë biletën për në Gjermani verën e ardhshme.
Shqipëria nuk ka luajtur ende as gjysmën e ndeshjeve të kësaj fushate kualifikuese, por pas nisjes me humbje në transfertën polake, fitoret me Moldavinë 2- 0 dhe Ishujt Faroe në transfertë, e vendosën skuadrën në pozicionin e dytë në Grupin E, me 6 pikë pas tri ndeshjesh, vetëm -1 pikë nga Çekia kryesuese dhe +3 nga Levandovski me shokë.
Por si do mund të arrijë Shqipëria të kualifikohet? Ekzistojnë 3 variante të mundshme që na japin mundësi të ëndërrojmë:
Së pari, një fitore në Pragë nesër, rezultat për të cilin Silvinjo ka premtuar se ka udhëtuar drejt Çekisë, do t’i katapultonte kuqezinjtë në krye me 9 pikë, ndërsa Polonia me shumë mundësi do t’u bashkohej çekëve në vend të dytë, duke parë sfidën e lehtë në letër në Varshavë përballë Ishujve Faroe.
Nëse ndodh mrekullia në “Fortuna Arena”, kuqezinjtë vijnë në Tiranë të dielën me euforinë për të mos e ndërprerë këtu kapitullin e misionit të tyre, ndërsa një tjetër rezultat maksimal ndaj polakëve, mund të thuhet se e mbyll këtu historinë e kualifikimit në finalet e Europianit.
Një Shqipëri me 12 pikë pas 5 ndeshjesh dhe e para e grupit, e vendos skuadrën në pozicion shumë komod, madje edhe për mbrojtje rezultati në tri sfidat e radhës: presim Çekinë në 12 tetor dhe duke mos humbur kualifikohemi automatikisht pavarësisht rezultateve të rivalëve, shkojmë në Moldavi në 17 nëntor dhe presim Ishujt Faroe në Tiranë më 20 nëntor.
