Kristjan Asllani ishte shumë pranë kalimit te Sasuolo në formë huazimi megjithatë vetë lojtari ka shprehur dëshirën për të qëndruar te Interi dhe si duket, klubi ka vendosur të plotësojë dëshirën e tij. Megjithatë, mediat italiane raportojnë se Asllani ka tashmë një tjetër risk për sezonin e ri.
Interi firmosi ditën e djeshme me mesfushorin holandez Davi Klasen i cili u largua me parametra zero nga Ajaksi duke u bashkuar me zikaltërit. Kjo lëvizje në merkato, bën që të shtohen forcat në mesfushë dhe për pasojë, Inzagi duhet të mendojë mirë për listën që do të ketë në Champions për sezonin e ri.
“Gazzetta dello Sport” raporton se nuk do të merren të gjithë dhe dy të rrezikuarit janë Stefano Sensi dhe Kristjan Asllani. Njëri prej tyre, me shumë gjasa do të mbetet jashtë listës që do të dorëzohet në UEFA.
