Kompania telefonike “ONE” ndërpreu shërbimet e abonentëve të saj për disa ditë më radhë, duke krijuar një situatë kaotike, për qytetarët, të cilët pavarësisht tarifave të paguara, mbetën pa shërbim.
Deputetja demokrate Albana Vokshi sjell në vëmendje situatën, duke dënuar sjelljen e AKEP, që sipas saj, nuk i është përgjigjur interesit publik.
Sipas saj, AKEP është urdhëruar të mbrojë kompaninë “ONE”.
Në një njoftim më 24 Gusht, përmes një deklarate të shkurtër, enti shtetëror që ka për detyrë të veprojë si rregullator i fushës së komunikimeve elektronike, ka konstatuar problematikën. AKEP thotë se ka kryer një inspektim gjatë gjashtëmujorit të parë të këtij viti, duke i vendosur One Albania sh.a. masa administrative të shoqëruara nga një sërë rekomandimesh për korigjimin e problemeve teknike të brendshme me impakt në vijueshmërinë dhe cilësinë e shërbimit.
Po ashtu, shton se në këtë kuadër, do të vlerësojë situatën pas kryerjes së verifikimeve që parashikohen nga legjislacioni në fuqi. Gjithashtu, shton se kompania “mund të paditet drejtpërdrejt dhe në çdo moment në gjykatë për vlerësimin dhe kompensimin e dëmit të shkaktuar”.
Reagimi i Vokshit
Deputetja Vokshi e quan njoftimin “të larë gojën”. Ajo kujton se “problemet e abonentëve nuk kanë nisur as dje e as sot, por kanë që nga muaji dhjetor 2022, që po torturojnë qytetarët dhe subjektet, të cilët të mbetur pa shërbim denoncojnë çdo ditë”.
“AKEP, si rregullator në tregun e komunikimeve elektronike, ka futur kokën si struci dhe nuk ka ndërmarrë asnjë veprim që i jep si detyrim legjislacioni, që t’i dalë në mbështetje qytetarëve, duke ndërhyrë me instrumenta ligjore në ndaljen e kaosit të paprecedent që ka krijuar prej më shumë se 8 muaj një sipërmarrës i licencuar nga AKEP. Po ta shikosh deklaratën e fundit të AKEP, dallon evazivitetin, si dhe përdorjen e një narrative të përgjithshme, e cila jo vetëm nuk merr në mbrojtje qindramijë pajtimtarët që kanë një shërbim të cunguar, ose janë pa shërbim fare, për të cilin ata edhe kanë paguar. Deklarata e AKEP shkon dhe në cinizëm, duke i ftuar pajtimtarët të shkojnë vetë në gjykatë, në vend që si institucion rregullator të ndërhynte menjëherë për zbatimin e ligjit, në kthimin në normalitet të shërbimeve që ka premtuar në marrjen e licencës sipërmarrësi ONE”, shprehet Vokshi.
Sipas saj, AKEP nuk ka vlerësuar asnjëherë marrëdhëniet mes sipërmarrësit dhe pajtimtarëve, duke i lënë dore të lirë sipërmarrësit që të hartojë kontrata në favor të tij dhe në dëm të qytetarëve. Nga këto kontrata të njëanshme, shton, qytetarët nuk kanë ku të ankohen, nuk mund të rimbursohen për dëmet që ju krijohen.
“Ndaj AKEP përdor cinizmin duke i drejtuar qytetarët në gjykatë, sepse kontratat janë në disfavor të qytetarëve, dhe për çdo gabim që bën sipërmarrësi ai nuk mund të sanksionohet. Ndaj AKEP, përcjell me qetësi situatën, pasi ka siguri që sipërmarrësin nuk e gjen gjë, pavarësisht se qindramijë pajtimtarë janë në kaos për marrjen e shërbimeve që paguajnë. AKEP nuk ka reaguar, sepse ashtu është urdhëruar. Kujtoj këtu që Rama e ka nën kontroll të plotë AKEP, me emërimin politik në krye të tij të njeriut të tij të afërt, Shefin e tij të Protokollit. Personalisht, nuk kam pritshmëri që AKEP do të kryejë funksionin e tij për aq kohë sa Rama të mos urdhërojë një gjë të tillë. E me sa kemi parë… nuk ka qenë asnjë ditë në interesin e tij mbrojtja e qytetarëve…”, shkruan Vokshi në një postim në “FB”.
Deputetja e mbyll reagimin duke zbuluar se i është drejtuar AKEP me kërkesa konkrete për të bërë transparente qëndrimet dhe vendimmarrjet në lidhje me “situatën shqetësuese të krijuar”.
