Ka shkuar tmerrësisht keq tentativa e një 42-vjeçari në Fier për të djegur disa barishte në tokën e tij.
Kjo pasi, zjarri doli nga kontrolli dhe për pasojë u dogjën 20 hektarë me bimësi, 2 hektarë vreshta dhe 400 rrënjë ullinj në fshatin Jarua, madje duke rrezikuar edhe djegien e banesave në zonë.
Për këtë arsye policia ka vënë në pranga 42-vjeçarin Fabio Rrapaj duke e akuzuar për zjarrvënie.
Njoftimi i Policisë:
Shërbimet e Komisariatit të Policisë Fier, me marrjen e njoftimit se në fshatin Jarua, Levan, kishte rënë zjarr dhe ishte përhapur në sipërfaqe të mëdha pyjore, menjëherë kanë organizuar punën për identifikimin dhe kapjen e autorit.
Falë veprimeve të shpejta e profesionale, bazuar dhe në inteligjencën informative, shërbimet e Policisë kanë bërë të mundur identifikimin dhe arrestimin e autorit të dyshuar të zjarrvënies, shtetasit F. Rr., 42 vjeç, banues në fshatin Jarua, Fier.
Ky shtetas, me qëllim djegien e barishteve në tokën e tij, ka ndezur zjarr dhe për shkak të erës, zjarri ka marrë përmasa të mëdha duke djegur 20 hektarë me bimësi, 2 hektarë vreshta dhe 400 rrënjë ullinj.
Materialet do i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme procedurale.
