Më 22 gusht të vitit 1995 lindi në Londër, këngëtarja shqiptare Dua Lipa. Vajza e Anesa Rexhës dhe Dukagjin Lipës, nga Prishtina, u influencua që e vogël prej babait të saj, dikur vocalist dhe kitarist i grupit kosovar të muzikës rock “Oda”.
Dua nisi fillimisht karrierën si modele, për të arritur më pas në 2015 famën në nivel ndërkombëtar me këngën “Be the one”. Dua është vlerësuar me gjashtë çmime “Brit”, tre çmime “Grammy”, dy “MTV Europe Music Awards”, një “MTV Video Music Award”, dy “Billboard Music Awards”, një “American Music Award”.
Megjithëse është në majat e famës duke pasur me miliona adhurues e ndjekës, Dua Lipa vazhdon të mbajë lidhje të forta me familjen dhe rrënjët e saj shqiptare.
Më herët ajo zuri faqet e para të medieve që trajtojnë showbiz-in, për pushimet që zgjodhi të bënte në Shqipëri. Ndërkohë sot, në ditën e saj të lindjes, Dua Lipa u shfaq në Instagram me librin e Patti Smith, për të cilën shkruan se e vlerëson maksimalisht dhe se do ta intervistojë së shpejti.
“Do të kisha dashur të isha pjesë e një epoke kaq të lezetshme. Patti na jep gjënë tjetër më të mirë, ndoshta rrëfimin më magjepsës të shkruar ndonjëherë për Nju Jorkun e viteve ’70. Jam e emocionuar që së shpejti do të flas me Pattin, një bisedë që mezi pres ta ndaj me ju”, shkroi ne Instagram, Dua Lipa. /ata/
