Pamjet të frikshme janë ato që publikojnë mediat greke nga qyteti në flakë i Alexandropuli-t. Për të katërtën ditë radhazi flakët kanë shkrumbuar çfarëdo që gjejnë përpara tyre, duke bërë që banorët e mbi 10 fshatrave të braktisin banesat e tyre.
Indeksi i rrezikut është i lartë edhe për vetë qytetin, me banorët që kanë përfunduar në rrugë e sheshe, ndërsa si masë paraprake mbrëmjen e djeshme është evakuuar shtëpia e të moshuarve, spitali i qyteti dhe institucioni kishtar për pacientët me sëmundje kronike.
Dhjetëra mjete ajrore të forcave zjarrfikëse dhe ushtrisë janë ngritur në ajër për të ndihmuar në vënien në kontroll të flakëve. Aktualisht 4 avionë zjarrfikës dhe 3 helikopterë të tjerë po punojnë për të ndihmuar 214 zjarrëfikës me 59 automjete, që kanë ndërhyrë nga toka.
Pak pas orës 3 të mëngjesit, banorët e zonave Elaionas, Elato, Pefki dhe Agios Georgios iu kërkua po ashtu të evakuoheshin në drejtim të qendrës së qytetit të Aleksandropolit.
Në të njëjtën kohë, fshatrat Aisymi, Palagia dhe Kirki, të cilat ndodhen pranë zonave ku zjarri vazhdon të përpijë gjithçka, u evakuuan si masë paraprake.
Sipas e-evros.gr, që citon deklaratat e kreut të Shërbimit Zjarrfikës të Aleksandropolit, zjarri ka kaluar nëpër poligonin e qitjes dhe ka avancuar drejt spitalit të zonës.
Rreth 130 të moshuar u larguan nga shtëpia e të moshuarve Joakimio dhe institucioni kishtar për të sëmurët kronikë i Mitropolisë së Aleksandropolit, me ndihmën e forcave të bashkisë.
“Kemi kërkuar ndihmën e KTEL Alexandroupolisi cili siguronte autobusë për transportin në një vend të sigurt të mysafirëve të dy strukturave të Mitropolisë së Aleksandropolit. Të shoqëruar nga punonjës policie dhe me ndihmën e stafit të thirrur nga priftërinjtë, ata u evakuuan në dy grupe pasi zjarri ishte afruar te dy godinat. Fatkeqësisht nuk është bërë e mundur lëvizja e rreth 70 të moshuarve të shtrirë në shtrat për sigurinë e tyre dhe në vendngjarje kanë shkuar njësitet kompetente zjarrfikëse”, tha kryebashkiaku Yannis Zamboukis.
Bashkia po ashtu ka njoftuar se qytetarët që kanë braktisur banesat e tyre mund të qëndrojnë në palestrën “Mihalis Paraskevopoulos” dhe teatrin e zonës. Të hapura për të akomoduar njerëzit nga zonat e evakuuara janë kishat.
Po ashtu bashkia ka hapur edhe parkingun në port, por edhe sallën e nisjeve dhe parkingun e aeroportit “Dimokritos”.
