Nuk ka vetëm fjalë të mira për Shqipërinë turistike, që kryeministri Edi Rama dhe ministria Mirela Kumbaro propagandojnë në rrjetet e tyre sociale.
Pavarësisht fluksit të shtuar të turistëve nga Italia, që mendohet ti kenë kaluar 500 mijë këtë verë, nga përtej Adriatikut ka edhe kritika për pushimet në vendin tonë.
Gazeta e njohur italiane “Il Messaggero” ka ndërtuar një artikull të shkurtër kushtuar Shqipërisë turistike, duke shfaqur anën e errët të saj, përmes komenteve të italianëve që kanë pushuar këtë verë në bregdetin e jugut.
Sipas artikullit përtej reklamave për pushime “loë cost”, janë të shumtë italianët që kanë rrëfyer se kanë mbetur të zhgënjyer me Shqipërinë, e veçanërisht me atë që ka nisur të quhet “Maldivet e Europës”, Ksamilin.
“Çmimet e restoranteve në Shqipëri priren të jenë më të ulëta se në Itali, por vetëm nëse vendosni të vizitoni ato plazhe më pak të preferuara prej turistëve. Sepse në Sarandë dhe Ksamil, dy destinacionet e zgjedhura nga të gjithë për pushime në Shqipëri, tarifat janë të stilit Ibiza. Një kafe kushton 4.50 euro, një Belveder për tre persona kushton 50 euro, por të tjerat janë me çmime edhe më të larta dhe shkojnë deri në 200. Shumë nga ato që thuhet për Shqipërinë në Itali janë të vërteta, të paktën këtu në Ksamil”, shkruhet aty.
Në artikull, disa prej kritikave kryesore për zonat bregdetare të Shqipërisë janë: mungesa e parkimeve publike, shezlonget që janë ngjitur njëri-tjetrit, çmimet e larta të ushqimeve dhe alkoolit, dhe fakti që paguhet vetëm në lek dhe jo në euro.
“E sponsorizuar gjithandej nga video të realizuara nga “influencers” por realiteti është krejtësisht ndryshe”, shkruan sakaq një vizitor italian që ka zgjedhur Shqipërinë për pushime.
“Plazhe të vogla plot me çadra dhe shezllone kudo, zhavorr në vend të rërës që e sjellin kamionë të posaçëm, ujë i turbullt, jet ski që qarkullojnë majtas-djathtas gjithë ditën me erën e gazit ngjitur. Dhe përsëri vrazhdësi, ngasin keq dhe gjithmonë ka trafik. Çmime të larta sikur të ishim në Miami, papastërti kudo dhe rrugë të këqija. Nje makth“, vijon komenti.
Në fund bëhet edhe një krahasim me pushimet në Itali dhe këtu theksi vendoset te papastërtia në rrugët e qyteteve, kryesisht Saranda dhe Ksamili.
“Trafiku kilometrit, mungesa e edukatës, pisllëku dhe qentë endacakë në nivele të pahijshme. Çmimet shumë më të larta se sa pritej. Në Ksamil kemi paguar një çadër dhe 2 shezlongë nga 25 € deri në 50 € dita. Nuk do të kthehemi më kurrë”, është komenti i një tjetër italiani.
Ata që kërkojnë plazhe dhe zona me më shumë jetë nate nuk janë kthyer po ashtu të kënaqur.
“Flitet shumë për Italinë, ku çmimet janë shpesh të ekzagjeruara, por aty është shërbimi. Këtu janë në një fazë transformimi dhe për momentin vetëm i kanë rritur çmimet pa përshtatur strukturat”, thotë një turist.
Mediat italiane theksojnë se shumë qytetarë nga fqinji përtej Adriatikut u nisën në Shqipëri këtë vit, të nxitur nga komentet që tregonin për çadrat dhe shezlonget me 10 euro dhe darkat e peshkut me 20 euro. Këto sipas italianëve të zhgënnjyer ekzistojnë në Shqipëri, por rrallë në zonat ekskluzive dhe plazhet e smeraldëta.
